Россия куздан буён илк бор Украинадаги йўқотишлари ҳақида хабар берди. Бу қарши ҳужум билан боғланди

Россия мудофаа вазири Сергей Шойгу анъанани бузди Украинанинг қарши ҳужуми ҳақида ҳисоб бера туриб, Россия томони йўқотишлари ҳақида ҳам маълумот берди. Унинг версиясига кўра, украинларнинг қарши ҳужуми уч кун олдин бошланган ва «муваффақият билан қайтарилган».

Унинг маълумотига кўра, Украинадаги урушнинг сўнгги уч кунида 71 нафар россиялик ҳарбий хизматчи ҳалок бўлиб, 210 нафари яраланган. Шу вақтга қадар вазирлик фақат икки марта ўзининг ҳалок бўлган ҳарбийлари сони бўйича маълумот берганди. Украина ва бошқа мустақил манбалар аниқлаган рақамлар Россия ҳарбий идораси келтирадиган рақамлардан кескин фарқ қилади.

«Афсуски, йўқотишларимиз бор. Украина қуролли кучларининг ҳужумини қайтариш жараёнида 71 нафар россиялик ҳарбий ҳалок бўлди, яна 210 нафари яраланди», деди у.

Шунингдек, россияликлар 15 та танк, 9 та пиёда жанговар машинаси, 2 та автомобиль ва 9 та тўпдан айрилгани тан олинган.

Украина томонининг «йўқотишлари»

Шойгу Киев «уч кун мобайнида» «фронтнинг турли участкаларида анча вақтдан буён ваъда қилинган ҳужумни амалга ошириб, бунинг учун катта миқдордаги техника ва жонли кучларни жамлагани»ни айтган. Унинг сўзларига кўра, 4 июн куни Украина қуролли кучларининг 23- ва 31-механизациялашган бригадалари бешта йўналишда ҳужум қилишга уринган, аммо ортга «улоқтириб ташланган».

Шойгунинг айтишича, 4 июн кунги ҳужумда украинлар бирорта йўналишда муваффақиятга учрамаган ва жиддий йўқотишга учраган: 300 ҳарбий, 16 танк, 26 та жанговар зирҳланган машиналар, 14 автомобил.

РФ мудофаа вазири Украина қуролли кучлари 5 июн куни бешта бригада билан еттита йўналишда ҳужум қилишга уринганини айтган. Унинг сўзларига кўра, «душман тўхтатилган, янада кўпроқ йўқотишларга учраган» - 1600 дан ортиқ ҳарбий хизматчи, 28 танк, жумладан саккизта Leopard ва ғилдиракда ҳаракатланувчи AMX-10 русумли учта танк.

Шойгу Украина томонининг уч кунлик ҳарбий ҳаракатлардан кейинги жами йўқотишлари сони 3715 нафарни ташкил этаётганини айтган. Шунингдек, россиялик ҳарбийлар украинларнинг 52 та танки, 207 та жанговар зирҳли машинаси, бешта самолёти, иккита вертолёти, 48 та дала артиллерияси қуроллари ва 53 та дронини йўқ қилган.

Россия ҳарбийлари Украина қуролли кучларига бундай зарар етказгани бўйича ишонарли далиллар йўқ. Кремлпараст телеграм-каналларда ҳам Шойгунинг Украина армияси йўқотишлари тўғрисида келтирган рақамларга ишончсизлик билан қаралмоқда. «Ҳарбий мухбирлар» 20 га яқин техникалар, жумладан танклар йўқ қилингани акс этган видеоларни тарқатган, аммо улар қаерда ва қандай ҳолатда эканини аниқлаб бўлмайди.

РФ мудофаа вазирлиги эса «Leopard танклари йўқ қилиниши» сифатида тушунарсиз видео эълон қилди. Бу видеода зирҳли техникаларга эмас, қишлоқ хўжалиги техникаларига зарба берилиши акс этган.

Шойгунинг бугунги баёнотидаги янгилик фақат ҳалок бўлган ҳарбийлар сони бўлди - 71 киши. Мудофаа вазирлиги бешта йўналишда қарши ҳужум қилишга уриниш бўлгани ҳақида аввалроқ, 5 июнга ўтар кечаси хабар берганди. Шу кунги ва кейинги пресс-релизларда 23- ва 31-бригадалар ҳам, 16 та танк ҳам, шунингдек, Украина томони йўқотишлари ҳам тилга олинганди (бу сешанба куни Шойгунинг россияликларнинг йўқотишлари ҳақида келтирган рақамлардан 50 баробар кўп). Бирлашган қўшинлар гуруҳи бошлиғи Валерий Герасимов гўёки «украинлар ҳужум қилган йўналишлардан бирида олдинги чизиқдаги бошқарув пунктида бўлгани» ҳақидаги маълумот ҳам такрорланди.

Шойгу Россия армияси йўқотишлари тўғрисида сўнгги бор 2022 йил 21 сентябрида, Россия президенти Владимир Путин қисман сафарбарлик эълон қилиши билан бир вақтда маълумот берганди.

Ўшанда Россия мудофаа вазири босқин бошланганидан буён берилган йўқотишларни 5 937 кишига баҳолаганди. Бу рақамларни у «Россия-24» берган интервюсида келтирган, бу интервю Путин Россия халқига «қисман» сафарбарлик ҳақида эълон қилиши ортидан берилганди.

Бунга қадар Россия мудофаа вазирлиги қайтариб бўлмас йўқотишлар тўғрисида 25 март куни маълумот берганди ва 1 351 киши ҳалок бўлгани тан олинганди.

Лекин бу рақамлар ҳақиқий йўқотишларни акс эттира олмайди.

Ҳақиқий йўқотишлар кўпроқ

BBC нашри «Медиазона» билан ҳамкорликда очиқ манбалар асосида ҳалок бўлган россиялик ҳарбийлар рўйхатини юритади.

Россия регионларидаги маъмурлар ва бошқа расмий манбалар аллақачон Украинада ҳалок бўлган 25 мингдан ортиқ ҳарбийнинг шахсини тасдиқлаган. Шойгу сўнгги уч кундаги 71 қурбон ҳақида гапирар экан, босқин бошидан буён берилган йўқотишларни очиқламади.

Украина ҳукумати эса баҳорда бошланиши кутилган қарши ҳужуми бошлангани тўғрисида ҳамон расман эълон қилмади.

Украина мудофаа вазири ўринбосари Анна Малярнинг айтишича, Россия томонининг Украина қарши ҳужумни бошлагани тўғрисидаги хабарлари омма эътиборини Россия қўшинлари Бахмут атрофидаги позицияларини бой бераётгани ҳақидаги хабарлардан чалғитишга қаратилган. Вазир ўринбосари украин кучлари фронт чизиғи бўйлаб айрим ҳудудларда ҳужум ҳаракатларини бошлаганини айтган, аммо буни йирик амалиётнинг бир қисми сифатида ҳисобламаслик кераклигини қайд этган.

Шойгунинг қарши ҳужум ва йўқотишлар тўғрисидаги баёноти Каховка ГЭСдаги вайронгарчиликлар ҳақидаги янгиликлар фонида янгради. Украин ҳарбийлари электр станция тўғони Россия кучлари томонидан портлатилганини маълум қилган. Кремль ГЭСдаги портлашга алоқадорлигини рад этган ва буни «Украина томонининг қасддан амалга оширган диверсияси» деб баҳолаган. Шойгу эса Украина Каховка ГЭСни Россия ушбу ҳудудда юриш қилишига йўл қўймаслик учун портлатганини айтди.

Мустақил таҳлилчилар эса тўғоннинг юқори қисми ўтмишдаги отишмалар туфайли қулаган бўлиши мумкинлигини истисно этишмаяпти. Нима бўлганда ҳам, сешанба куни тонгда Украина президенти офиси маслаҳатчиси Михайло Подоляк айтганидек, бу ҳодиса қарши ҳужум режаларига таъсир қилиши мумкин: «Кенг кўламли ҳаракатлар вақтида доим улар [тузатишлар] амалга оширилади».