АҚШни қамраб олган Канада ўрмон ёнғинлари тутуни Норвегияга яқинлашмоқда

Канададаги юзлаб ўрмон ёнғинлари тутуни тез орада Норвегияга етиб бориши ва муаммоларни келтириб чиқариши мумкин. Бу ҳақда Associated Press хабар бермоқда.

ZUPR / BACKGRID / Vida Press

Норвегиялик мутахассисларнинг фикрича, смог (тутун, қурум, кул зарралари, чанг, ёнилғи буғи кабилар аралашмасидан иборат заҳарланган ҳаво) аллақачон Гренландия ва Исландияда кузатилган, яқин келажакда у жанубий Норвегияда пайдо бўлади. Сўнгги бир неча кундан бери Канаданинг Квебек провинциясида ўрмонлар ёнмоқда. BBC News маълумотларига кўра, ўрмон ёнғинлари майдони 3,3 миллион гектарни ташкил этади. Канада бош вазири Жастин Трюдо мамлакат тарихидаги «энг ёмон ўрмон ёнғинлари мавсуми»га дуч келаётганини айтди. Қаттиқ тутун туфайли минглаб авиарейслар бекор қилинган ёки кечиктирилган.

7 июнь куни ёнғин тутуни Қўшма Штатлар бўйлаб тарқалиб, 10 дан ортиқ штатга таъсир қилди. Нью-Йорк, Вашингтон ва Филаделфияда ҳаво ифлосланишининг энг ёмон кўрсаткичлари қайд этилди. Бродвейда спектакллар санъаткорлар нафас олишда муаммоларга дуч келгани ҳақида шикоят қилганидан сўнг тўхтатилди.