Қўқон шаҳри бозорида катта ёнғин чиқди

Ёнғин соат 19:17 да бошланган, уни бартараф қилиш чоралари кўрилмоқда.

12 июнь куни Фарғона вилояти, Қўқон шаҳри, Байналмилал кўчасида жойлашган «Буюк ипак йўли» савдо мажмуаси ҳудудидаги дўкон расталарида ёнғин чиққан. Бу ҳақда Фавқулодда вазиятлар вазирлиги хабар берди.

«10 та ёнғин-қутқарув экипажи соат 19:25 да воқеа жойига етиб бориб, ёнғин ўчирилмоқда. Вазият назоратга олинган. Ёнғин оқибатида фуқароларнинг куйиш тан-жароҳати олиш ва ҳалок бўлиш ҳолатлари тўғрисида хабар келиб тушмади. Қўшимча маълумот тақдим этилади», дейилади дастлабки хабарда.

ФВВ соат 20:37 да бу ҳақда қўшимча маълумот берди.

«Ёнғин қуршаб олинди, айни вақтда ёнғинни батамом ўчириш ишлари амалга оширилмоқда», дейилади хабарда.