Норвегия Украинанинг ядровий хавфсизлиги учун 250 миллион крона беради

Норвегия ҳукумати Украинанинг ядровий хавфсизлиги учун 250 миллион крона (тахминан 21,5 миллион евро) ажратмоқчи. «Уруш Украина ядровий хавфсизлигига таҳдид солади», дейилади ТИВ 19 июнь, душанба куни эълон қилган баёнотда. «Украинадаги ядровий авария нафақат Украинанинг ўзи, балки чегараларидан ташқарида ҳам оқибатларга олиб келади».

Таъкидланишича, Атом энергияси бўйича халқаро агентликка ўз мутахассисларининг Украинадаги бир қатор атом электр станциялари, жумладан, Чернобил ва Запорижжя АЭСда қолишини таъминлаш учун 100 миллион крона юборилади. Қолган 150 миллион крона атом электр станциялари мажмуалари хавфсизлигини таъминлашга йўналтирилиши керак. 

Маблағлар 2023 йилдан 2027 йилгача Украинани қўллаб-қувватлаш учун мўлжалланган махсус фонддан олинади. Бу даврда Норвегия Украинага фуқаролик ва ҳарбий ёрдам учун жами 75 миллиард крона ажратмоқчи. 

15 июнь куни Атом энергияси бўйича халқаро агентлик раҳбари Рафаэл Гросси ЗАЭСга ташриф буюрди. Унинг сўзларига кўра, у ерда вазият «жиддий». Ҳозирда агентлик экспертлари гуруҳи доимий равишда у ерда бўлиб турибди.