Мексикада талабаларни ўғирлаганликда айбланиб, 8 нафар ҳарбий ҳибсга олинди

Мексикада 2014 йилда 43 талабанинг ўғирланишига алоқадорликда айбланиб, саккиз нафар ҳарбий хизматчи қўлга олинди. Бу ҳақда 27 июнь, сешанбага ўтар кечаси мамлакат ташқи ишлар вазирининг миграция ва инсон ҳуқуқлари бўйича ўринбосари Алехандро Энсинас Twitter’да маълум қилди.

Гумонланувчилар ўтган ҳафтада Бош прокуратура 2022 йил сентябр ойида чиқарилган, аммо кейинчалик бекор қилинган ҳибсга олиш тўғрисидаги 16 та ордерни тиклаганидан сўнг ҳибсга олинган. 

Қайд этилишича, ҳозирда тергов изоляторларида тўрт нафар ҳарбий хизматчи, жумладан, терговга кўра, олти нафар талабани ўлдириш ҳақида буйруқ берган бир командир бор. Яна саккиз нафар ҳарбийга нисбатан ҳибсга олишга ордер берилди. 

Мексика жанубидаги Игуала шаҳрида жойлашган Айотзинап коллежи талабалари 2014 йил 27 сентябрга ўтар кечаси ғойиб бўлди. Улар Мехикодаги намойишда қатнашмоқчи бўлган. Тахминларга кўра, талабалар полиция ходимлари томонидан ўғирлаб кетилган, кейинчалик Мексикадаги Guerreros Unidos гиёҳвандлик картели вакилларига топширилган, улар, ўз навбатида, ёшларни рақиб жиноий тўда аъзоларига алоқадор деб ҳисоблаган.

2022 йил август ойида 43 нафар Айотзинап талабаси иши бўйича Ҳақиқатни аниқлаш ва адолатга эришиш комиссияси ёшлар ҳаётдан кўз юмган бўлиши мумкинлигини эълон қилди. Ўшанда Мексика ташқи ишлар вазири ўринбосари Алехандро Энсинас айтганидек, ўғирланганлар «давлат жинояти» қурбони бўлган. 

2022 йил март ойида, шунингдек, Мексика денгиз пиёда аскарлари ва армия мансабдор шахсларига қарши йўқолган талабалар иши бўйича тергов олиб борилаётгани хабар қилинган эди, улар далилларни сохталаштиришда гумон қилинмоқда.