Буюк Британия «Челси»ни сотишдан тушган пулни фақат Украинада сарфлашга рухсат берди

Украинани тарк этган қочқинлар ушбу маблағларга даъвогарлик қилолмайди.

Фото: Reuters

Британия ҳукумати Роман Абрамовичнинг «Челси» футбол клубини сотишдан тушган пулларини Украинадан ташқарида ишлатишни тақиқлади. Бу ҳақда Украинадаги урушдан жабр кўрганларга ёрдам жамғармаси раҳбари Майк Пенроуз айтди.

Пенроуз Абрамовичнинг клубни сотишдан олган барча даромадлари ўз жамғармасига ўтказилганини, бу пулларни фақат Украинадаги уруш қурбонларига ёрдам сифатида ва унинг оқибатларини бартараф қилишга йўналтириш мумкинлигини эслатди.

Буюк Британия ҳукуматининг жамғармага берган кўрсатмасига кўра, маблағлар фақат Украина географик чегараси ичида сарфланиши мумкин. Украинадан ташқаридаги украиналикларга, шу жумладан Буюк Британиядаги украиналикларга пул бериш бўйича ҳар қандай сўровлар кўриб чиқилмайди. Жамғарма раҳбари сўзларига кўра, шу туфайли Украинани тарк этишга мажбур бўлган қочқинларга ёрдам беришнинг иложи йўқ.

«Ҳукумат ва Европа Иттифоқи шартларига кўра, қочқинлар Украинани тарк этиши билан моддий ёрдам тўхтатилади. Гуманитар ёрдам олаётган жабрдийдаларнинг кўпчилиги, асосан аёллар ва болалар шу йўлдан бормоқда», деди у.

Пенроуз сўзларига кўра, қаерда бўлишидан қатъи назар, ночор одамларга 2,35 млрд фунт стерлингни сарфламаслик ғояси «деярли уятли».

2023 йил апрелида россиялик олигарх Роман Абармович «Челси» клубини 2,35 млрд фунт стерлингга сотди. Тадбиркор барча маблағни Украинадаги уруш қурбонларига тарқатишни таклиф қилди.

Абрамовичнинг ўзи Россия ҳукумати билан алоқалари туфайли 2022 йил март ойида Буюк Британия ва Европа Иттифоқи санкциялари остида қолган, шу туфайли клубни сотишдан олган даромаддан фойдалана олмас эди. Ҳозир у санкциялардан қутулиш мақсадида судга мурожаат қилган.