Москва ғалла битимини узайтириш учун ҳеч қандай сабаб кўрмаяпти

Россия ТИВ вакили FT’да Росселхозбанкнинг шуъба корхонасини яратиш ва уни SWIFT’га улаш имконияти ҳақида эълон қилинган хабарга изоҳ берди. Захарова схемани «ўтиб бўлмайдиган» деб ҳисоблади.

Фото: AA

Москва муддати 17 июлда тугайдиган Қора денгиз дон ташаббусини узайтириш учун ҳеч қандай сабаб кўрмаяпти. Россия Ташқи ишлар вазирлиги вакили Мария Захарова 4 июль, сешанба куни Financial Times (FT) нашрида эълон қилинган хабарга изоҳ берди. Газетанинг 2 июль куни ёзишича, ЕИ санкцияга учраган Росселхозбанкка ғалла битимини сақлаб қолиш учун SWIFT’га кириш ҳуқуқига эга шуъба корхонасини ташкил этишга рухсат бериши мумкин.

Захарованинг сўзларига кўра, гап «аниқ ўтиб бўлмайдиган схема» ҳақида бормоқда. Унинг сўзларига кўра, «қавслар ортида» банк филиалини очиш учун кўп ойлар кетиши, SWIFT’ни ташкил этиш яна 3 ой давом этиши, уни «бир неча дақиқада» узиб қўйиши эҳтимоли ҳам бор.

2022 йил июль ойида Россия ва БМТ ўртасида уч йил муддатга Россия қишлоқ хўжалиги маҳсулотларини жаҳон бозорларига экспорт қилиш бўйича англашув меморандуми имзоланди.

АҚШ, Европа Иттифоқи ва Буюк Британия санкциялари натижасида Россиядан озиқ-овқат ва ўғит етказиб бериш тўсиб қўйилган, асосий муаммолардан бири ихтисослаштирилган Росселхозбанкнинг SWIFT тизимидан узилиши муносабати билан банк тўловларига хизмат кўрсатишдир, деб ҳисоблайди Москва.

Озиқ-овқат шартномаси 2022 йил 22 июлда Истанбулда тузилган. Ўшанда Россия мудофаа вазири Сергей Шойгу ва БМТ бош котиби Антониу Гутерриш Россия қишлоқ хўжалиги маҳсулотлари ва ўғитларини жаҳон бозорларига етказиб беришга кўмаклашиш бўйича меморандумни имзолади. Шу билан бирга, Украина делегацияси Туркия ва БМТ билан ғалла экспорти бўйича шартнома имзолади.

Росселхозбанкнинг эҳтимолий шуъбасини SWIFT’га улаш масаласи ўтган ҳафта ЕИ саммитида Москвани шартнома муддати тугаганидан кейин уни узайтиришга кўндиришнинг потенциал воситаси сифатида муҳокама қилинди, деб ёзади FT.

#Москва #ғалла