Туркия Россиядан «ғалла битими»ни узайтиришини кутмоқда

Туркия президенти Ражаб Тоййиб Эрдўған Россия етакчиси Владимир Путин билан «ғалла битими»ни узайтириш масаласини муҳокама қилмоқчи. Аввалроқ Москва ўз талаблари бажарилмагани учун келишувни бузиш билан таҳдид қилган эди.

Фото: Reuters

Туркия Қора денгиз дон ташаббусининг узайтирилишига умид қилмоқда, деди президент Ражаб Тоййиб Эрдўған 7 июль, жума куни. Россия, Туркия, Украина ва Бирлашган Миллатлар Ташкилоти (БМТ) иштирокчи бўлган дон экспорти шартномаси муддати 17 июлда тугайди.

Анқара келишув камида 3 ойга узайтирилишига умид қилмоқда, бироқ 2 йилга узайтирилиши тарафдори, деди Эрдўған Истанбулда Украина президенти Володимир Зеленский билан учрашувдан кейин. Туркия раҳбарининг сўзларига кўра, у келаси ой Туркияда бу масалани Россия президенти Владимир Путин билан ҳам муҳокама қилиш ниятида. Кремль аввалроқ бундай учрашув бўлиши мумкинлигини тасдиқлаган, бироқ аниқ санани айтмаганди.

Россия БМТ ва Туркия воситачилигида 2022 йилнинг ёзида Украина Қора денгиз портларининг Россия денгиз блокадасини тугатган келишувни янгиламаслик билан таҳдид қилмоқда. Москва бу ташаббус келишувнинг ажралмас қисми эканлигини ва унинг иккинчи қисми, хусусан, Россия озиқ-овқат ва ўғит экспортига рухсат беришни назарда тутувчи Россия-БМТ меморандуми амалга оширилмаяпти, деган позицияда.

Ўз навбатида, БМТ бош котиби Антониу Гутерриш Россия ва Украинадан озиқ-овқат ва ўғитлар экспорти глобал озиқ-овқат хавфсизлигини таъминлашда давом этаётганини таъкидлади. «Ушбу келишувлар халқаро ҳамжамият замонамизнинг муаммоларини инобатга олган ҳолда нималарга қодирлигини кўриш учун камдан-кам имкониятдир», - дейилади баёнотда.

БМТ маълумотларига кўра, Қора денгиз ғалла ташаббуси туфайли ўтган йили 32 миллион тонна ғалла ташилган ва бу дунёда озиқ-овқат нархининг пасайишига катта ҳисса қўшган.