ЕИ Беларусдаги президент сайловларининг 3 йиллиги муносабати билан янги санкциялар тайёрлаяпти

Европа Иттифоқи мамлакатдаги президентлик сайловларининг 3 йиллигига муносабати билан Беларусда инсон ҳуқуқлари бузилиши бўйича янги санкциялар пакетини жорий қилмоқчи. Бу ҳақда DW мухбирига 18 июль, сешанба куни Брюсселда Европа Иттифоқининг юқори мартабали амалдори хабар берди. Унинг аниқлик киритишича, 9 августгача ушбу чеклов чоралари жорий этилади. 

Параллел равишда Минскка қарши яна бир санкциялар пакети муҳокама қилинмоқда, бу Беларуснинг Украинага қарши Россия ҳарбий агрессиясидаги иштироки билан боғлиқ, деди манба. Беларусга қарши ЕИ томонидан олтита санкциялар пакети жорий қилинган. Охиргиси бир йил олдин кучга кирган. Украина урушидаги иштироки муносабати билан Минскка қарши янги чеклов чоралари муҳокамаси Европа Иттифоқида бир неча ойдан бери давом этмоқда. 

Беларусда президентлик сайловлари 2020 йил 9 август куни бўлиб ўтган. Александр Лукашенко ўзини ғолиб деб эълон қилди, сайловолди кампаниясининг қолган иштирокчилари қамалди ёки мамлакатни тарк этишга мажбур бўлди. Сайлов натижаларини сохталаштиришга қарши оммавий норозилик намойишлари натижасида ўн минглаб беларуслар қўлга олинди. 

Ҳозирда ҳибсга олинган, сайловлар вақтидаги мухолифат ҳаракати етакчилари Сергей Тихановский, Виктор Бабарико ва Мария Колесникова билан нима содир бўлаётгани номаълум, чунки улар билан бир неча ой давомида алоқа бўлмаган. Брюссел Александр Лукашенкони Беларуснинг қонуний президенти деб ҳисобламайди ва демократик кучлар етакчиси Светлана Тихановская билан мамлакат келажаги ҳақида мулоқот ўтказмоқда.