Британиянинг янги элчиси: Ҳамкорлигимизни ривожлантириш мумкин бўлган соҳалар кўп

Тимоти Смарт дипломатик хизматдан кетаётган Тимоти Торлоу ўрнига Буюк Британиянинг Ўзбекистон Республикасидаги элчиси этиб тайинланди. Смарт Ўзбекистондаги фаолиятини август ойи бошида бошлайди.

“Буюк Британиянинг Ўзбекистондаги элчиси бўлиб тайинланиш мен учун катта шараф. Мамлакатларимиз ҳамкорлигини ривожлантириш мумкин бўлган кўп соҳалар бор. Ўзбекистон тарихи, бой маданияти ва меҳмондўстлиги билан яқиндан танишиш имконияти пайдо бўлганидан катта ҳаяжондаман. Мен Ўзбекистон ҳукумати ва халқи билан ҳамкорликда ишлашни интизорлик билан кутмоқдаман”, – дея янги элчининг сўзларини келтирди Британиянинг Тошкентдаги элчихонаси.

Тимоти Смарт Буюк Британиянинг Ташқи ишлар, ҳамдўстлик ва тараққиёт вазирлигидаги фаолиятини 1999 йилда бошлаган. У Исроил, Ироқ, Соломон ороллари, Фижида дипломат сифатида, Мадагаскарда эса 2012-2017 йилларда элчи бўлиб ишлаган.

У, шунингдек, вазирликнинг Европа Иттифоқи, Яқин Шарқ ва Шимолий Африка бўлими, Стратегик коммуникациялар бўлими ва Шарқий Ўрта ер денгизи бўлими бошлиғи бўлиб ишлаган.

Эслатиб ўтамиз, 2019-2023 йилларда Буюк Британиянинг Ўзбекистондаги элчиси сифатида Тимоти Торлоу ишлаган эди.