АҚШ ҳарбий-денгиз флоти раҳбари лавозимига биринчи марта аёл номзоди илгари сурилди

АҚШ президенти Жо Байден тарихда илк бор АҚШ ҳарбий-денгиз флоти штаб бошлиғи лавозимига аёл адмирал Лиза Франкетти номзодини илгари сурди. Оқ уй тегишли пресс-релизни 21 июль, жума куни эълон қилди. Франкетти номзоди ҳали АҚШ Сенати томонидан тасдиқланиши керак. 

Франкетти ҳозир АҚШ ҳарбий-денгиз флоти бошлиғининг операциялар бўйича ўринбосари. Илгари у Ўрта Ер денгизидаги АҚШнинг 6-флотига ва Кореядаги иккита авиаташувчи ҳужум гуруҳига қўмондонлик қилган ва Америка Қўшма Штатлари армияси штаб бошлиқлари бирлашган қўмитасининг стратегия, режалар ва сиёсат бўйича директори лавозимида ишлаган. Франкетти номзодини эълон қилар экан, Байден унинг армиядаги 38 йиллик тажрибасини таъкидлади. 

Франкеттидан ташқари АҚШ президенти денгиз флотининг операциялар бўйича бошлиғи ўринбосари лавозимига вице-адмирал Жеймс Килбини, Ҳинд-Тинч океани қўмондонлиги раҳбари лавозимига эса адмирал Самуэл Папарони таклиф қилди. Илгари Папаро АҚШ ҲДФ штаб бошлиғи лавозимига энг эҳтимолий номзод деб ҳисобланган. АҚШ ҳарбий-денгиз флотининг амалдаги қўмондони адмирал Майк Гилдэй истеъфога чиқади. 

Адмирал Лиза Франкеттининг Сенатда АҚШ ҲДФ қўмондони лавозимига номзоди кечиктирилиши мумкин, деб ёзади CNN. Республикачи сенатор Томми Тубервил бир неча ой давомида АҚШ Мудофаа вазирлигининг репродуктив саломатлик сиёсатига норозилик сифатида Пентагоннинг бир неча юқори мансабдор шахсларини тайинлашга тўсқинлик қилмоқда.

Жо Байден Тубервилнинг позициясини қоралаб, уни «нафақат нотўғри, балки хавфли» деб атади. «Америка халқи ҳарбийларимиз ва уларнинг оилалари ёнида, - деди президент. - Мен Сенатдан муҳим ҳарбий тайинловларни имкон қадар тезроқ тасдиқлашни сўрайман». 

2022 йилда Байден адмирал Линда Фэганни Қўшма Штатлар Соҳилни қўриқлаш хизмати бошлиғи этиб тайинлади. Бироқ, Соҳилни қўриқлаш хизмати Мудофаа вазирлигига эмас, балки АҚШ Ички ишлар вазирлигига тегишли.