Испанияда консерваторлар кўпчилик овозга эга бўлмаган ҳолда сайловда ғалаба қозонди

Испанияда парламентдаги 136 ўринни Альберто Фейхоонинг консерватив Халқ партияси эгаллайди, амалдаги бош вазир Педро Санчеснинг Испания Социалистик Ишчи партияси (ИСИП) эса қонун чиқарувчи органда 122 ўринга эга бўлади. Бундан 24 июль, душанбага ўтар кечаси мамлакатда навбатдан ташқари умумий сайловларда бюллетенларни ҳисоблаш натижалари дарак беряпти.

Шу билан бирга, сайловчиларнинг 12,4 фоизи ўта ўнг «Вокс» партиясига овоз берди, бу эса унга парламентда 33 ўрин беради. Ҳозирги меҳнат ва ижтимоий иқтисодиёт вазири Йоланда Диас бошчилигидаги «Сумар» партиясининг чап қанот популистлари эса парламентда 31 ўринга эга бўлади. 

Мавжуд вазият «сиёсий боши берк кўчага» олиб келиши мумкин, чунки эҳтимолий коалициялардан ҳеч бири парламентда кўпчиликни ташкил қилиш учун етарлича аниқ овоз тўплай олмаган, деб ёзади APE агентлиги. Шу тариқа, «Вокс» билан бирлашиши башорат қилинган консерваторлар, бу ҳолатда ҳам 350 ўриндан атиги 169тасини олади, ИСИП, «Сумар» ва коалициядаги бир қанча кичик партиялар эса жами 172 ўринга эга бўлади. 

Шу билан бирга, минтақа мустақиллиги тарафдори бўлган ва парламентда етти ўринни қўлга киритган Каталониянинг Junts партияси лагерларнинг бирортасига қўшилмаган. Унинг норасмий раҳбари, Мадрид ноқонуний деб ҳисоблаган минтақани ажратиш бўйича референдумдан сўнг мамлакатни тарк этган Каталония собиқ президенти Карлос Пучдемон ҳам ИСИП, ҳам Халқ партиясини қўллаб-қувватлашдан бош тортди.

Коалицияларнинг ҳеч бири Конгрессда кўпчилик ўринни қўлга киритиш учун 176 овозлик кўрсаткичдан ўта олмаса, мамлакатда янги сайловлар ўтказилиши мумкин.