Жиддий ЙТҲлар сонини 2030 йилгача 1,5 баробарга камайтириш режа қилинмоқда

Ўзбекистонда жиддий оқибатлар билан боғлиқ йўл-транспорт ҳодисалари сонини 2030 йилгача камида 50 фоизга камайтириш режалаштирилмоқда. Бу – муҳокама учун эълон қилинган Ўзбекистон–2030 стратегияси лойиҳасида кўрсатилган.

Стратегияни 2023 йилда амалга ошириш чоралари тўғрисидаги қарор лойиҳасига кўра, 2024 йилда жиддий оқибатлар билан боғлиқ ЙТҲлар сонини 10 фоизга камайтириш кўзда тутилган.

Лойиҳалардан 2023 йил учун мақсадли кўрсаткич ўрин олмаган. Феврал ойида Йўл ҳаракати хавфсизлиги хизмати ўз олдига 2023 йилда ЙТҲлар ва улардаги ўлимлар сонини 15 фоизга камайтиришни мақсад қилиб қўйган эди. Лекин амалда бунинг акси кузатилмоқда.

28 июл куни президент ўтказган йиғилишда айтилган рақамларга кўра, йилнинг 1-ярмида 4 мингга яқин автоавариялар содир этилиб, уларда 873 киши ҳалок бўлган, 3,5 мингдан ортиқ одам жароҳатланган.

Бу – ўтган йилги кўрсаткичлардан сезиларли юқори. 2022 йилнинг 1-ярмида қайд этилган 355 та ЙТҲда 784 киши ҳалок бўлиб, 2775 киши жароҳат олганди.

Ўтган ҳафтадаги йиғилишда президент ИИВ Йўл ҳаракати хавфсизлиги хизмати бошлиғи Олим Саидовга ҳайфсан берди. Жиззах, Сурхондарё ва Хоразм вилоятлари ЙҲХБ бошлиқлари лавозимидан олинди.

Ўзбекистон-2030 стратегияси лойиҳасида, шунингдек, 7 йил ичида икки ва ундан ортиқ полосали тартибга солинмаган пиёдалар ўтиш йўлакларини светофорлар билан тўлиқ жиҳозлаш ҳам кўзда тутилган.

Бу борада ҳам 2023 йил учун кўрсаткичлар белгиланмаган. 2024 йилда эса икки ва ундан ортиқ полосали тартибга солинмаган пиёдалар ўтиш жойларининг светофор билан жиҳозланганлик даражасини 50 фоизгача етказиш режа қилиняпти.

Стратегияга кўра, автомобил йўлларини қуриш ва бошқариш хусусий секторга ўтказилади. Бу борадаги “йўл харитаси”ни 2023 йил сентябргача ишлаб чиқиш кўзда тутиляпти.

Хусусий сектор иштирокида 2030 йилгача 56 минг км йўлни реконструкция қилиш мақсади ҳам белгиланган. Шундан, 2023 йилда 8 минг, 2024 йилда 9 минг км йўл қайта қурилиши мумкин.

7 йил давомида туман марказларидан ҳар бир қишлоқ аҳоли пунктларигача жами 5,5 минг км цемент-бетон қопламали йўллар қуриш режаси бор. Бу бўйича 2023-2024 йилларга мақсадли кўрсаткичлар аниқ эмас. Бу йўлларнинг қурилиш-смета ҳужжатлари шу йил охиригача тайёр бўлиши мумкин.

Пулли автомобил йўлларини қуриш ва улардан фойдаланишнинг ҳуқуқий асосларини белгилаш бўйича норматив-ҳуқуқий ҳужжат ишлаб чиқилади. Дастлабки пулли йўллар Тошкент–Самарқанд ва Тошкент–Андижон йўналишида бўлиши кўзда тутилган. Бу лойиҳаларнинг техник-иқтисодий асосларини ишлаб чиқишни 2023 йил ноябрда якунлаш режа қилинган.

Халқаро аҳамиятга эга автомагистрал йўлларни мобил интернет билан таъминлаш даражасини 90 фоизга етказиш ҳам мўлжал қилиняпти. Бу борада 2023-2024 йилларга мўлжалланган режа октябр ойида тайёр бўлиши керак.