Дунёдаги ҳар иккинчи электромобил Хитойда ишлатиляпти

Дунёдаги барча электрдвигателли ва гибрид автомобилларнинг ярмидан кўпи Хитойда ишлатиляпти. Бу ҳақда 2 август, чоршанбага ўтар кечаси Штутгарт тадқиқот институти ZSW маълумотларига таяниб, dpa агентлиги хабар берди. Унга кўра, 2023 йил бошига келиб Хитой йўлларида 14,6 миллион электромобил ҳаракатланган бўлса, бу уларнинг дунёдаги умумий сонининг 53 фоизини, яъни 27,7 миллион донани ташкил этади. 

Иккинчи ўринда 3,4 миллион электромобил рўйхатга олинган АҚШ жойлашган. Учинчи ўринда 1,9 миллион дона шундай машиналар мавжуд бўлган Германия. Франция ва Буюк Британия мос равишда 1,1 миллион ва 1 миллион электромобил билан тўртинчи ва бешинчи ўринларда. 

Хитой, ZSW маълумотларига кўра, нафақат электромобиллар бозорида ҳукмронлик қиляпти, балки унинг бошқа мамлакатлардан ўзиб кетиши тобора ортиб бормоқда. «Агар Германия 2030 йилга бориб кўчаларга 15 миллион электромобилларни чиқариш бўйича ўз олдига қўйган мақсадига эришмоқчи бўлса, у ҳолда ҳар йили 2022 йилдагидан икки баравар кўп автомашиналарни рўйхатдан ўтказиши керак», деди институт матбуот котиби Андреас Пюттнер.