Володимир Зеленский саммит қаерда бўлишини аниқ айтмади. Илгари Швейцария эҳтимолий жой сифатида кўрсатилган эди.
Украина шу йилнинг кузида глобал тинчлик саммитини ташкил этиш ниятида, деди президент Володимир Зеленский. «Куз келяпти, лекин саммитга тайёргарлик кўриш ва дунёнинг аксарият давлатларини жалб қилиш учун ҳали вақт бор. Бу сизнинг фаоллигингизга боғлиқ», — деди Зеленский 2 август, чоршанба куни Украинанинг хорижий дипломатик муассасалари раҳбарлари билан учрашувда.
Украина президентининг сўзларига кўра, Киев ушбу саммитга «дунёнинг кўпчилик қисми» – «Шимол ва Жануб, Шарқ ва Ғарб» вакилларини йиғмоқчи. Володимир Зеленский дунёнинг аксарият давлатлари ва халқлари тинчлик, халқаро осойишталик ва Россиядан таҳдидлар бўлмаслигига интилаётганини таъкидлади. Саммит айнан қаерда бўлишини у айтмади. Илгари Швейцария эҳтимолий жой сифатида кўрсатилган эди.
Украина президенти «тинчлик формуласи»ни кўрсатмалардан бири деб атади – у 2022 йил ноябрида ишлаб чиқилган бўлиб, Россия билан музокаралар олдидан қўйилиши керак бўлган 10 та талабдан иборат. Бу талаблар орасида жаҳон озиқ-овқат ва ядро хавфсизлигини тиклаш, шунингдек, Россия қўшинларини босиб олинган ҳудудлардан олиб чиқиб кетиш ва асирларни озод қилиш бор.
Зеленский, шунингдек, Украинага хавфсизлик кафолатларини беришга тайёр G7 мамлакатларига қўшилган давлатлар рўйхати кенгайтирилганини маълум қилди. Унга кўра, еттиликка яна 12 давлат – Бельгия, Дания, Ирландия, Исландия, Испания, Норвегия, Нидерландия, Португалия, Руминия, Финландия, Чехия ва Швеция қўшилган. Президентнинг қайд этишича, Киев АҚШдан бошлаб ушбу давлатлар билан икки томонлама келишувлар устида иш бошламоқда.
