Фарғонада қаттиқ чиқиндиларни қайта ишлаш бўйича Финландия технологияси жорий этилади

Вилоят ҳокимлиги ахборот хизмати маълумотига кўра, учрашувда SETCleanTech томонидан ишлаб чиқарилаётган Tyrannosaurus қаттиқ чиқиндиларни автоматик ажратиш ва қайта ишлаш линиясини Фарғона вилоятда жорий этиш масаласи муҳокама қилинди.

Дунёнинг энг илғор технологияларига асосланган ушбу линия, бугунги кунда кўплаб хорижий мамлакатларда 200 дан зиёд чиқиндини қайта ишлаш корхонасида ўрнатилган. Ушбу технология орқали ёнмайдиган чиқиндилар ажратиб олингач, қолган чиқиндилардан асосан цемент заводларида фойдаланишга мўлжалланган SRF ёқилғиси ишлаб чиқарилади. 

Қаттиқ маиший чиқиндиларни қайта ишлаш соҳасида Ўзбекистонда «нол чиқинди» (zero waste) тамойиллари жорий этилаётгани, барча чиқинди полигонларида чиқиндиларни тўлиқ қайта ишлаш йўлга қўйилаётгани қайд этилиб, бу борада SETCleanTech компанияси билан ҳамкорлик муҳим бўлиши қайд этилди.

Ушбу технологияларни SETCleanTech томонидан маҳаллий тадбиркорлар билан ҳамкорликда Фарғонада жорий этиш, бу борада Европа ва жаҳон молиявий институтларининг кредит маблағларини жалб этиш бўйича биргаликда лойиҳа ишлаб чиқиш бўйича ҳамкорликнинг келгуси қадамлари борасида келишиб олинди.