«Биз Путин билан ажойиб суҳбат қурдик» — Маскни Американинг «соядаги раҳбари»га қиёслашмоқда

«Сайёрадаги энг бой одам ва АҚШнинг асосий бизнесмени Илон Маск АҚШ хавфсизлиги ва фаровонлиги учун муҳим шахс бўлиб бормоқда, бу эса Оқ уй ва Пентагонни тобора хавотирга соляпти», деб ёзади Американинг нуфузли New Yorker журнали.

Мақола устида бир йил давомида ишлаган журналист Ронан Фарроу Маск ўзи Starlink сунъий йўлдош алоқаси билан таъминлаган Украинага қилган босқинидан кейин ҳам Владимир Путин билан гаплашгани ва Пентагон қандай қилиб битта хусусий шахснинг иродасига боғланиб қолганини билиб олган.

Ва фақат Пентагонгина эмас.

«Охирги 20 йил давомида инфратузилма таназзулга учраши ва институтларга бўлган ишонч ёмонлашуви фонида Маск, давлат аллақачон хусусийлаштирган ва чиқиб кетган стратегик соҳаларда бизнес қилди. Америка ҳукумати Маскка таянишга мажбур, аммо ҳозирча унинг инжиқликлари, таваккалчилик ва можароларига мойиллигига қандай чора кўришни билмайди», дейилади New Yorker мақоласида.

«НАСА, Мудофаа ва Транспорт вазирлиги, Федерал авиация бошқармаси ва Меҳнатни муҳофаза қилиш бошқармасининг амалдаги ва собиқ амалдорлари менга эндиликда Маскнинг таъсиридан қочиб қутулиб бўлмаслигини айтишди ва уларнинг баъзилари ҳатто уни ҳукуматнинг махфий вакили сифатида қабул қилишларини тан олди», деб ёзади Фарроу.

Бу Америка нашрлари Маскнинг ўсиб бораётган таъсирини Жо Байден маъмурияти учун бош оғриқ деб атаган биринчи мақола эмас. Bloomberg мухбирлари «Қандай қилиб Илон Маскнинг глобал империяси уни Вашингтон учун долзарб муаммога айлантирди?» деб номланган катта мақоласида Маскнинг мақоми президент мақомига яқинлашаётганини ёзган.

«Байден маъмуриятининг баъзи юқори мартабали амалдорлари улкан бизнес империяси, мислсиз бойлиги ва сиёсий алоқалари туфайли Маскка деярли тегиб бўлмайди, деб қўрқишади. У бир томонлама қарор қилади, масалан, Украина Starlink’дан қаерда ва қандай фойдаланиши мумкинлигини у ҳал қилади ва бу Пентагон пудратчисининг эмас, балки президентликнинг ваколатидир», деб ёзади Bloomberg.

Маск унга миллиардлар берган кучдан фойдаланишдан тортинмайди. Ва у АҚШ позициясини илгари суришдан узоқ.

«Америка ташқи сиёсати йўналишига тескари ўлароқ, Маск Украинадаги урушни тугатиш бўйича россияпараст режа ва Пекинда олқишларга сазовор бўлган Тайванни Хитой билан бирлаштириш ғояси билан чиқди», деб ёзади Bloomberg.

АҚШнинг рақиблари назарий жиҳатдан Маскка унинг бизнес империяси орқали таъсир ўтказиш имкониятига эга.

Маскка тегишли Tesla автомобилларининг ярмидан кўпи Хитойда йиғилади. У Twitter (ҳозир Х)ни сотиб олиш учун пулни Яқин Шарқдан йиғди.

Маскнинг АҚШдаги яна бир стратегик ташкилоти — SpaceX космик компаниясидир. Маск урушдан тахминан бир йил олдин Путин билан коинот масаласини муҳокама қилганини тан олди. Ва кенг кўламли уруш бошланганидан кейин у билан гаплашишни рад этди.

Бироқ New Yorker нашрининг таъкидлашича, алоқа давом этган ва 2022 йил октябр ойида ўзаро суҳбат бўлиб ўтган. Бу ҳақда журналга ўша пайтда АҚШ мудофаа вазири ўринбосари бўлган Колин Кал хабар берган.

Кал Маскка у билан Украина армияси учун Starlink хизматларини тақдим этиш билан боғлиқ вазиятни муҳокама қилиш учун қўнғироқ қилган.

«Телефонда Маск ноутбукига қараётгани ва Starlink фаоллиги харитасида «урушнинг бутун жараёни»ни кўраётганини айтди. Ва уч дақиқадан сўнг у «Биз Путин билан ажойиб суҳбат қурдик» деди», деган Кал.

«Ва шу ерда ҳаммамиз ўйлаб қолдик: «Хўш-хўш, мана бу энди ёқимсиз», дея қўшимча қилган New Yorker нашри манбаси.