CNN: Судандаги дронлар зарбасига Украина алоқадор бўлиши мумкин

Украина махсус хизматлари Суданда Россиянинг «Вагнер» ХҲК томонидан Африка мамлакати мунтазам армияси билан тўқнашувда қўллаб-қувватланган Тезкор ҳаракат кучларига (RSF) қаратилган бир қатор дрон зарбалари ортида турган бўлиши мумкин. Бу ҳақда Американинг CNN медиакомпанияси томонидан 19 сентябр, сешанба куни эълон қилинган суриштирувда айтилади. Муаллифлар Украинанинг ушбу зарбалар сериясига алоқадорлиги ҳақидаги маълумотни мустақил тасдиқлай олмаган. Бироқ қўлга киритилган видеоёзувларда «учувчисиз учоқлардан фойдаланган ҳолда Уруш уруш услуби» белгилари кўриниб турибди, дея таъкидлайди CNN. 

14 сентябрдан бери интернетда тарқалаётган видеоларда дрон қуролланган одамлар бўлган юк машинаси томон катта тезликда учиб келаётгани ва автомобил кузови остига урилганини кўриш мумкин. CNN’га интервю берган экспертларнинг таъкидлашича, қўлланган тактика, яъни учувчисиз учиш аппаратларининг юқори тезликда нишонга шўнғиши схемаси Судан ва бутун Африка минтақаси учун жуда ғайриоддий. Америка медиакомпанияси маълумотларига кўра, камида саккизта шундай ҳужумда тижорат дронлари иштирок этган ва кадрда олинган дронда украинча ёзув кўринган. 

Суданда Украина махсус хизматлари ишлаяптими? 

Украина дрон тасвирлари орқали олинган ҳужумлар учун жавобгарликни расман ўз зиммасига олмади. Бироқ, CNN билан суҳбатда украиналик ҳарбий манба бу операцияни «Судан ҳарбийлари иши эмас» деб атади. Ҳужумлар ортида Киев турибдими, деган саволга жавоб берар экан, манба «бу катта эҳтимол билан Украина махсус хизматларининг иши» эканини айтди. Ўз навбатида, Судандаги юқори мартабали ҳарбий манба «Украинанинг Судандаги операцияси ҳақида ҳеч нарса билмаслигини» ва бу ҳақиқат эканлигига ишонмаслигини айтди. 

CNN таъкидлашича, агар Украина разведка хизматларининг Судандаги ҳужумларда иштирок этгани ҳақидаги маълумотлар тасдиқланса, бу Киевнинг Москвага қарши ҳарбий операциялари театрининг провокацион ва драматик кенгайишини, шунингдек, Украина уруши оқибатлари Европадан ташқарига тарқалганини англатади.

«ГУР» CNN маълумотига изоҳ берди 

Украина Мудофаа вазирлиги Бош разведка бошқармаси («ГУР») вакили CNN’га Украина махсус хизматларининг Судандаги дрон ҳужумларида иштироки эҳтимоли ҳақида изоҳ берди. «Биз буни на тасдиқлай оламиз, на инкор эта оламиз», деди Андрей Юсов РБК-Украинага берган изоҳида.

Унинг сўзларига кўра, «ГУР» фақат Россия кучлари бутун дунё бўйлаб ўз таъсирини йўқотаётганини айтиши мумкин. «Бу, хусусан, Африкага тегишли. Генерал Будановнинг Украина россиялик ҳарбийларни дунёнинг исталган нуқтасида, қаерда бўлишидан қатъий назар йўқ қилади, деган сўзларини ҳам эслашимиз мумкин», - дея таъкидлади Юсов. 

Судан армияси ва махсус кучлари ўртасидаги зиддият

Мамлакатнинг амалда президенти бўлган Ўтиш давридаги суверен кенгаш раҳбари Абдул Фаттоҳ ал-Бурҳон бошчилигидаги Судан армияси ва «Вагнер» ХҲК томонидан қўллаб-қувватланган RSF ўртасидаги жанглар 15 апрелдан бери давом этмоқда. БМТ маълумотларига кўра, Судандаги можаро оқибатида камида 1800 киши ҳалок бўлган, минглаб одамлар яраланган. 350 мингга яқин суданлик мамлакатни тарк этди, бир миллионга яқини эса мамлакат ичида қочқинга айланди.