Қозоғистон Россияга 106 турдаги маҳсулотни экспорт қилишни тақиқлади

Россияга қарши жорий этилган санкциялар туфайли, ҳарбий мақсадлар учун мўлжалланган 106 хил турдаги товарлар экспортига чеклов киритилди.

Фото: ТАСС

Қозоғистон Савдо ва интеграция вазири ўринбосари Қайрат Тўребаев Украинага кенг кўламли босқиндан кейин Россияга қарши жорий этилган санкциялар туфайли, мамлакат Россияга 106 турдаги товарларни экспорт қилишни тақиқлаганини айтди.

«Биз ҳарбий мақсадлар учун мўлжалланган 106 хил турдаги товарлар экспортига чеклов киритдик. Уларнинг экспорти бутунлай чекланган», деди Тўребаев.

Унинг сўзларига кўра, бу товарлар орасида дронлар, ихтисослаштирилган электроника ва чиплар ҳам бор.

«Ушбу 106 номдаги товар Қозоғистонда ишлаб чиқарилмаган, лекин авваллари Қозоғистон орқали реэкспорт қилинган. Қозоғистонга импорт амалга оширилмоқда, экспорт қилинмаяпти. Улар нафақат Ғарбда, балки бошқа мамлакатларда ҳам ишлаб чиқарилади», деди Тўребаев.

Қозоғистон бош вазири ўринбосари, савдо ва интеграция вазири Серик Жумангарин аввалроқ Қозоғистондан Россияга икки мақсадли товарлар етказиб берилганини тан олган эди.

Унинг сўзларига кўра, санкцияларнинг бажарилишини назорат қилиш учун масъул бўлган Европа Иттифоқи ва АҚШ вакиллари Қозоғистон расмийларига санкцияга киритилган 7 мингта маҳсулот рўйхатини топширган – буларнинг барчаси, вазир таъкидлаганидек, мамлакатнинг Россия билан товар айирбошлашига тегишли.

Қозоғистон ҳукумати бунга жавобан санкцияга киритилган товарлар рўйхатини қисқартиришни сўраган. Натижада, янгиланган реестрга Украинада шикастланган Россия ҳарбий техникасидан топилган икки мақсадли товарлар киритилган.

Қозоғистон президенти Қосим-Жўмарт Тўқаев сентябр ойида Германияга ташрифи чоғида ўз мамлакати «Россияга қарши санкциялар режимига амал қилишини» айтган эди.