Запорижжя ва Одессага зарба оқибатлари, фронтдан қайтаётган жасадлар. Уруш суратлари

Украинадаги урушнинг 602-куни ўтди. Асосий маълумотлар:

• Запорижжяда ракета беш қаватли турар жой биносига келиб урилди. Беш киши ҳалок бўлган. Володимир Зеленский зарбани «Россия террори» кўриниши деб атади. РФ мудофаа вазирлиги зарбани изоҳламаган.
• The New York Times АҚШ Украинага узоқ масофага ҳаракатланувчи ATACMS ракеталаридан атиги 20 та берганини хабар қилди. Владимир Путин Украинага бундай ракеталар юборилишини «Қўшма Штатлар томонидан йўл қўйилган навбатдаги хато» деб атади.
• Давлат думаси ядро синовларини тақиқлаш ҳақидаги келишувдан бош тортиш тўғрисидаги қонун лойиҳасини маъқуллади.
• Москва шарқида ракета заводи очилди — турар жойлардан 500 метр масофада.
• Financial Times нашри Ғарб давлатлари Исроилнинг ҳарбий ҳаракатларини маъқуллаши Москвани яккалаб қўйиш учун қилинган саъй-ҳаракатларни йўққа чиқаргани ҳақида ёзди.
• РФ мудофаа вазирлиги тунда 28 та дрон уриб туширилгани ҳақида хабар берди. Ҳарбий идора тарқатган хабарда айтилишича, учувчисиз учиш аппаратлари Белгород ва Курск областлари, шунингдек, Қора денгиз акваторияси ҳудудида ҳаво ҳужумидан мудофаа кучлари томонидан тўхтатилган.
• Путин «Кинжал» комплекси билан жиҳозланган Миг-31 самолёти Қора денгиз устидаги бетараф ҳудудда навбатчилик қилишини маълум қилди.

Куннинг асосий воқеаси. Запорижжядаги уйга зарба

Россия қўшини 18 октябр куни Запорижжяга ракета зарбалари йўллади. Шаҳар кенгаши котиби Анатолий Куртевнинг хабар беришича, ракеталардан бири беш қаватли турар жой биносининг икки подъездини вайрон қилган. Беш киши ҳалок бўлган, яна беш киши яраланган. Украина президенти Володимир Зеленский Запорижжядаги турар жойга йўлланган зарбани «Россия террори» намойиши деб атади ва «Россия террори мағлуб этилиши лозимлиги»ни қайд этди.

Фронт чизиғида Россия ҳаво ҳужумидан мудофаа тизими жангчилари 

Донецк областидаги фронт чизиғидан олиб келинган украин ҳарбийлари жасадлари

Одесса ўққа тутилиши оқибатлари

17 октябрга ўтар кечаси Россия қўшинлари Shahed-136/131 типидаги дронлар билан Украинага ҳужум қилди. Украина қуролли кучлари Ҳаво кучларига кўра, барча дронлар йўқ қилинган. Украина ҚК «Жануб» оператив қўмондонлиги дронлардан бирининг парчалари Одессадаги яхта клуби ҳудудига тушганини маълум қилган. Парус спорти мактаби ва ангар ҳудуди вайрон бўлган, хусусий катер ва яхталар шикастланган. Одамлар орасида жабрланганлар йўқлиги хабар қилинган.

Киев. Россия асирлигидаги аёлни қўллаб-қувватлаб ўтказилган акция 

Владимир Путин Хитойдаги форумда

17-18 октябр кунлари Владимир Путин Хитойда бўлди. Бу унинг 2023 йил мартида Халқаро жиноят суди РФ президентини ҳибсга олишга ордер берганидан буён иккинчи бор хорижга чиқиши бўлди. Пекинда у «Бир камар — бир йўл» форумида иштирок этди. Бу ХХРнинг Евросиё мамлакатлари иқтисодий ҳамкорлиги ва инфратузилмаларини ривожлантириш бўйича ташаббуси ҳисобланади. Путин форумда чиқиш қилди, Си Жинпинг, шунингдек Венгрия бош вазири Виктор Орбан билан музокаралар ўтказди.