Сеулдаги ҳарбийлар Пхенянни Россияга қисқа масофага учувчи баллистик ракеталар, танкка қарши ва кўчма зенит ракеталари, шунингдек, милтиқлар, ракета учириш қурилмалари, миномётлар ва снарядлар юборганликда гумон қилмоқда, дея хабар беради AP.
Шимолий Корея Украинага қарши уруш олиб бориш учун Россияга артиллерия снарядларидан ташқари бир неча турдаги ракеталарни тақдим этган бўлиши мумкин, деб хабар берди Associated Press 2 ноябр, пайшанба куни Жанубий Корея ҳарбийларига таяниб.
Уларнинг сўзларига кўра, Россия армияси «аниқланмаган миқдорда» қисқа масофага учувчи баллистик ракеталар, танкка қарши ракеталар ва кўчма зенит ракеталари, шунингдек, милтиқлар, ракета учириш қурилмалари, миномётлар ва снарядларни олган бўлиши мумкин.
Шимолий Корея АҚШ билан хавфсизлик соҳасида давом этаётган таранглик ва пандемия туфайли юзага келган ички қийинчиликлар шароитида Россия ва Хитой билан ҳамкорликни кенгайтиришга интилмоқда. КХДРнинг аниқ иқтисодий муаммоларидан айрим хорижий дипломатик ваколатхоналарини ёпиш режалари далолат беради, дея қайд этади AP.
Бир миллиондан ортиқ артиллерия снарядлари
Бир кун аввал Bloomberg Жанубий Корея разведкасига таянган ҳолда Шимолий Корея Россияга бир миллиондан ортиқ артиллерия снарядларини юборганини, Россия армияси улардан Украинага қарши урушда фойдаланаётгани ҳақида хабар берган эди. Ўтган ҳафтада АҚШ, Япония ва Жанубий Корея Шимолий Кореянинг Россияга ҳарбий техника ва ўқ-дорилар етказиб беришини кескин қоралаб, бундай юклар «Россия уруши қурбонлари сонини сезиларли даражада ошириши»ни билдирган эди.
Москва ва Пхенян бу айбловларни асоссиз деб рад этди.
