Сертификатга эга бўлмаган мутахассисларга айрим қурилиш объектлари бўйича шаҳарсозлик фаолияти билан шуғулланиш тақиқланади

Уларга кўп квартирали уйларнинг бошқариш органларига раҳбарлик қилиш ҳам тақиқланди.

Фото: Kun.uz

2025 йилдан сертификатга эга бўлмаган мутахассисларга юқори тоифали қурилиш объектлари бўйича шаҳарсозлик фаолияти билан шуғулланиш тақиқланади.

Қурилиш ва уй-жой коммунал хўжалиги вазирлиги ҳузуридаги Компетенцияни ривожлантириш институти ректори Аъзамиддин Қўлдошевнинг хабар беришича, шунингдек, уларга кўп квартирали уйларнинг бошқариш органларига раҳбарлик қилиш ҳам тақиқланди.

2024 йил 1 январдан бошлаб, экспертиза органлари экспертлари, назорат ўлчови мутахассислари, кўп квартирали уйларни бошқариш органлари раҳбарлари, вилоят ва туман (шаҳар) архитекторларини ўқитиш, 2024 йил 1 апрелдан бошлаб, ҳудудий назорат инспекциялари инспекторлари малакасини ошириш ва сертификатлаш тизими жорий этилади.

Шу билан бирга, шаҳарсозлик ва уй-жой коммунал хўжалиги соҳаларида мутахассисларни сертификатлаш тартиби тўғрисидаги низом тасдиқланган.