Энг арзон ва энг қиммат интернетга эга давлатлар аниқланди 

Picodi таҳлилчилари дунёнинг турли мамлакатларидаги уй (симли) интернети нархини солиштиришди. Бунинг учун улар 85 та давлатнинг 364 та провайдери нархларини текшириб, энг оммабоп тариф бўлган 100 Мбит/с учун ойлик нархни таққослаб кўришди. 

Маълум бўлишича, Ўзбекистонда 100 Мбит/с тезликдаги уй интернетининг ўртача нархи 17,6 долларга (≈217 минг сўм) тенг. Бу рейтингда йигирма учинчи кўрсаткич ҳисобланади. Дунёдаги энг арзон уй интернети Россияда қайд этилган: атиги 5,6 доллар. Ундан кейинги ўринларни Украина ($6,1), Руминия ($6,4), Виетнам ($6,7) ва Молдова ($7,7) эгаллаб турибди. 

Энг қиммат интернет Норвегияда қайд этилган - $79,4. Кейинги ўринларни Исландия ($ 62,1) ва Австралия ($61,8) эгаллаган.  

Тўлиқ рейтинг шундай кўринишга эга: 

Баъзи давлатлар, жумладан, Испания, Франция, Хитой ва Сингапур рейтингга киритилмаган. Чунки маҳаллий провайдерлар 100 Мбит/с тезликдаги тарифни таклиф қилмайди — нархлар рўйхатида бундан ҳам тезроқ интернет тарифлари мавжуд. 

Мутахассислар, шунингдек, 20 доллар ёки унинг маҳаллий валютадаги эквиваленти (Ўзбекистонда ≈246 минг сўм) билан қандай тарифга обуна бўлиши мумкинлигини текширишди. 

Бу нархга энг юқори тезлик Латвияда экани аниқланди – 1,2 Гбит/с. Энг паст тезлик Тожикистонда – 5 Мбит/с. 

Ўзбекистонда бу нархга 100 Мбит/с тезликдаги интернетга уланиш мумкинлиги қайд этилган (рейтингда 9-ўрин).