«Важные истории»: Россия авиация учун эҳтиёт қисмларини Украинадан оляпти

Россиянинг авиация саноатини эҳтиёт қисмлар билан таъминловчи «Авиа-ФЭД-Сервис» компанияси Украина уруши бошланганидан бери уларнинг катта қисмини Украинадан етказиб берди. Бу ҳақда 27 ноябр, душанба куни чоп этилган «Важные истории» нашри суриштирувида айтилади.

Украина уруши бошланганидан бери Россиянинг «Авиа-ФЭД-Сервис» ширкати Россия авиасаноатини камида 650 миллион рубллик эҳтиёт қисмлар билан таъминлади. Улардан 370 миллион рубллик қисмлар Украинадан етказиб берилди, деб ёзади «Важные истории» божхона декларациясига таяниб. «Авиа-ФЭД-Сервис» мижозлари орасида Россия Мудофаа вазирлиги, Ростеc давлат корпорацияси корхоналари ва «Россия» махсус президент парвоз отряди бор.

Божхона маълумотларига кўра, компания Украинадан Харкив машинасозлик заводи ФЭД томонидан ишлаб чиқарилган Ан-124 самолётларини таъмирлаш учун деярли 120 миллион рублга қисмлар ва Киевдаги «Радар» заводи томонидан ишлаб чиқарилган Ка-32 вертолётлари учун локация станциялари учун эҳтиёт қисмларни 67 миллиондан ортиқ рублга олиб келган.

Бундан ташқари, «Мотор Сич» томонидан ишлаб чиқарилган Ан-24 ва Ан-12 двигателларини таъмирлаш учун эҳтиёт қисмлар, Киевдаги «Артем» заводи, Харкив агрегат конструкторлик бюроси, Волчанск агрегат заводи ва Украинанинг бошқа корхоналари маҳсулотлари Россияга тахминан 170 млн рублга харид қилинган, деб ёзади «Важные истории».

Эҳтиёт қисмларни етказиб бериш учинчи давлатлар орқали амалга оширилган

«Авиа-ФЭД-Сервис» 2018 йилда Украина санкциялари остида қолган, шунинг учун унга Украина корхоналаридан етказиб бериш тўғридан тўғри эмас, балки Бирлашган Араб Амирликларида (БАА) рўйхатдан ўтган Linker компанияси орқали амалга оширилган, деб даъво қилмоқда «Важные истории». Linker Украина эҳтиёт қисмларини, шу жумладан «Мотор Сич»дан олган, унинг директори Вячеслав Богуслаев 2022 йил октябр ойида «Россия ҳужумкор авиацияси учун ҳарбий маҳсулотларни ноқонуний етказиб бериш»да гумон қилиниб қўлга олинган.

Linker’нинг «Авиа-ФЭД-Сервис» Россия компаниясига охирги таъминоти 2023 йилнинг январида амалга оширилган, деб ёзади «Важные истории» божхона маълумотларига таяниб. Кейинги етказиб беришлар 2023 йил апрел ойида рўйхатдан ўтган Қирғизистон компанияси орқали амалга оширилди, дея хабар беради нашр. 

Компаниялар раҳбарияти етказиб бериш ҳолатларини рад этяпти

Linker эгаси Алексей Палчик «Важные истории» нашрига Россияга маҳсулот етказиб бермаслигини айтди. «Linker компанияси Украинадан Россияга ҳеч нарса етказиб бермаган ва етказиб бермайди», деди у. Linker «Авиа-ФЭД-Сервис» компаниясига маҳсулот етказиб берганми ёки йўқми, аниқлик киритиш сўралганда, Палчик «жавоб беришга тайёр эмаслигини» айтди, деб ёзади «Важные истории». 

Россиянинг «Авиа-ФЭД-Сервис» ширкати директори Александр Решетникнинг «Важные истории»га айтишича, уруш пайтида компанияга келган Украина заводлари маҳсулотлари 2020-2021 йилларда сотиб олинган ва шунчаки «чет элда ётган». Бир неча ой олдин рўйхатдан ўтган Қирғизистон компанияси орқали етказиб бериш қандай амалга оширилган, деган саволга у жавоб бермади, деб ёзади «Важные истории».