Киев яна ракета ҳужумига учради

Россия 14 июлга ўтар кечаси Украина пойтахти Киевга ракета ва баллистик қуроллар ёрдамида ҳужум уюштирди. Шаҳарнинг бир нечта туманида ёнғинлар келиб чиқди, мактаб биноси яқинида катта чуқурлик ҳосил бўлди. Украина ҳаво мудофаа тизимлари ҳужумни қайтариш учун ишга туширилди.

Фото: AP

Киев шаҳар ҳокими Виталий Кличконинг маълум қилишича, ҳужум вақтида пойтахтда ҳаво ҳужумидан мудофаа (ҲҲМ) тизимлари фаолият юритган.

Унинг сўзларига кўра, Голосеев туманида икки манзилда омборхоналарга зарба теккан. Бунинг оқибатида ёнғинлар юзага келган.

Дарница туманида эса ракета парчалари очиқ ҳудудга тушган ва бир нечта автомобилга ўт кетган.

Киев шаҳар ҳарбий маъмурияти раҳбари Тимур Ткаченко маълум қилишича, Дарницкий туманида мактаб биноси ёнида катта чуқурлик ҳосил бўлган. Мактаб биноларининг ойнаси синган, бироқ иншоотнинг ўзига жиддий зарар етмаган. Шу билан бирга, ушбу ҳудудда ҳам автомобиллар ёнгани қайд этилган.

Украина Қуролли кучлари Ҳаво кучлари Россия томонидан пойтахтга қарши амалга оширилган ҳужумни тасдиқлади.

Айни пайтда ҳужум оқибатида ҳалок бўлганлар ёки жароҳатланганлар ҳақида расмий маълумот берилмаган.

Шу билан бирга, 13 июл куни Франция президенти Эммануэл Макрон Парижда Украина президенти Володимир Зеленский билан ўтказган қўшма матбуот анжуманида Украинага янги авлод SAMP/T зенит-ракета мажмуалари етказиб берилишини маълум қилди. Унинг айтишича, бу мажмуалар Украинанинг ҳаво мудофаа салоҳиятини мустаҳкамлашга хизмат қилади.

Бундан ташқари, Франция ва Украина Киев учун 16 та Rafale қирувчи самолётини харид қилиш бўйича «йўл харитаси»ни келишиб олди. Самолётлар 2028–2029 йилларда Украина ҳаво ҳудудида хизматни бошлаши режалаштирилган. Шунингдек, Украинага замонавий радиолокация тизимлари ҳам етказиб берилиши кўзда тутилган.