«Қўлимга қурол олгандан кўра, ўрмонда ўлишга тайёр эдим» - 14 кунлик хавфли йўл

Россияга ишлаш учун кетган самарқандлик Диёрбек ўз ҳаётидаги энг оғир синовлардан бирини бошидан ўтказди. У миграция масаласини ҳал қилиш таклифи берилган жойга борганида, унга ҳарбий шартнома имзолатилган ва кейинчалик Россия армияси таркибига тушиб қолганини айтмоқда.

Рус тилини билмагани, ҳужжат мазмунини тушунмагани сабаб нималарга имзо қўяётганини англамаган йигит бир неча ой давомида ҳарбий қисмларда бўлган.

Ундан жанг қилиш, машғулотларда қатнашиш талаб қилинган. Аммо у буни рад этганини билдирди.

“Мен уларнинг урушида жанг қилмайман. У менинг Ватаним эмас. Агар ўз Ватаним бўлганида, охиригача жанг қилардим”, - дейди Диёрбек.

Унинг айтишича, рад жавобидан кейин унга нисбатан босимлар бошланган. Калтакланиш, очлик ва оғир қийинчиликларга чидашига тўғри келган. Бироқ у жанг қилишдан кўра, бошқа қийинчиликларни кўтаришни афзал билган.

Унинг асосий мақсади битта - у ердан қочиш эди.

Озодликкача 790 километр

Диёрбек қочишга қарор қилгач, унинг олдида яна бир катта синов турганди. У Воронеждан Москва томон йўл олди.

Бу оддий сафар эмасди. Ҳар қадам хавфли бўлиб, агар қўлга тушса шу пайтгача кўрган азобларидан оғирроғига маҳкум бўлишини биларди. У хавфсизлик учун машина ёки поездда эмас, пиёда ҳаракат қилди. Фуқаро кийимида, сумкасига озиқ-овқат олиб йўлга тушди.

У қишлоқларга яқинлашмасликка ҳаракат қилди. Одамларга кўринмаслик учун асосан ўрмонлар, темирйўл атрофлари ва катта йўллар ёқасидан юрди.

Озиқ-овқати тугагач, тирик қолиш учун оғир шароитларга дуч келди.

“Кечалари чиқиндилардан егулик қидирган пайтларим бўлди. Ариқ ва каналлардаги сувларни ичишга тўғри келди", - дейди у.

Бироқ уни қўрқитган нарса очлик ёки ёлғизлик эмасди.

"Мен тоғда ўсганман. Ўрмонда қолишдан қўрқмадим. Менинг қўрққаним - яна тутиб олишлари ва ортга қайтаришлари эди", - дейди Диёрбек.

“Ўзбекистон байроғини кўрдим, қўрқув йўқолди...”

14 кундан кейин у Москвага етиб борди. Ўзбекистон элчихонаси биноси олдидаги байроқни кўрган лаҳзасини у алоҳида эслайди.

"Ўзбекистон байроғини кўрганимда ичимдаги қўрқув кетди. Ўзимни хавфсиз ҳис қилдим", - дейди Диёрбек.

Элчихона ёрдами билан у Ўзбекистонга қайтарилди. Бугун Диёрбек ота-онасининг бағрида.

"Ота-онамнинг қувонганини кўриб, у ердаги ҳамма азобларим тарқаб кетди", - дейди у.

Бу суҳбат бир ёш йигитнинг қисмати орқали чет элга ишлаш учун кетаётган минглаб юртдошларимизни огоҳлантириш учун тайёрланди. Тилни ва ҳуқуқни билмаслик, ҳужжатларни англамасдан имзолаш, шунингдек, урушга жалб этиш билан боғлиқ турли босим ва мажбурлашларга дуч келиш инсонни кутилмаган синовларга солиб қўйиши мумкин.