Юқори учликдан Яман, Ҳиндистон ва Қозоғистон жой олди.
АҚШ Касалликларни назорат қилиш ва олдини олиш марказлари (CDC) дунёда қизамиқ тарқалиши ҳақидаги маълумотларни эълон қилди.
Унга кўра, қизамиқ энг кўп аниқланган мамлакатлар Яман, Ҳиндистон ва Қозоғистон экани маълум бўлди.
Қайд қилинишича, Яманда 23 мингдан ортиқ, Ҳиндистонда қарийб 15 минг, Қозоғистонда 13 мингга яқин қизамиқ касаллиги қайд этилган. Кейинги ўринларни Эфиопия (11 мингдан ортиқ), Покистон (8 мингдан ортиқ), Конго Демократик Республикаси (6 мингга яқин) ва Россия эгаллаган (4 мингдан ортиқ).
Шу билан бирга, CDC ноябр ойи бошида Жаҳон соғлиқни сақлаш ташкилоти томонидан тақдим этилган маълумотларни келтирди. 6 декабр куни Қозоғистон Соғлиқни сақлаш вазирлиги мамлакатда қизамиқ билан касалланганлар сони 20 мингдан ошганини маълум қилган эди.
CDC қизамиқ эпидемияси кутилганидан каттароқ эканини таъкидламоқда. Улар бунга коронавирус пандемияси таъсир қилган деб ҳисоблашади: 2020 йилдан 2022 йилгача қизамиққа қарши вакцинанинг 61 миллион дозаси қўлланмаган ёки кечиктирилган.
Қизамиқни даволаб бўлмайди, инфекцияни олдини олишнинг ягона йўли эмлашдир.
