“Ўзбекнефтгаз” АЖ: Қашқадарёда ишга туширилган янги лойиҳа "Жанубий Тандирча" конининг умрини узайтиради

Кондаги табиий газ захираларини чуқур ўзлаштиришни таъминлашга қаратилган ушбу лойиҳа бош пудратчи – “Enter Engineering” компанияси билан ҳамкорликда амалга оширилди.

Объектнинг йилига 1 млрд куб метр табиий газни (5,9 МВт) ҳайдаб бериш қувватига эга.

"Жанубий Тандирча" конини ўзлаштириш 2001 йилда бошланган. Йиллар давомида ишлаб келган конда табиий газ қазиб чиқаришнинг камайиши ва қатлам босимининг табиий тушиши шароитида қазиб олинаётган газни барқарор етказиб бериш мақсадида конда сиқув компрессор станцияси қуриш технологик ечими ишлаб чиқилди. Станциянинг асосий вазифаси “Жанубий Тандирча” конида қазиб олинаётган газни 40 км масофадаги "Шўртан" базавий компрессор станцияларига босимини ошириб етказиб бериш ҳамда кондаги мавжуд углеводород захираларини максимал даражада ўзлаштиришдан иборат.

Станция лойиҳасида АҚШнинг "Cooper Machinery Services" компаниясининг "Superior WH74" русумли газ поршенли компрессорлари ва "Superior 16SGTD" русумли двигателлари қўлланган.

Шунингдек, Австриянинг “Jenbacher” компаниясининг 6 та газ поршенли электростанциялар ўрнатилган бўлиб, уларнинг ҳар бири соатига 800 кВт электр энергияси ишлаб чиқаради. Лойиҳани амалга оширишда Россия Федерацияси, Хитой ва бошқа давлатларда ишлаб чиқарилган технологик ускуналар ва аппаратлардан фойдаланилди.

Станциядаги агрегатлар 2023 йил декабр ойида ишга туширилди. Газ ҳайдаш агрегатининг ҳар бири кунига 1,5 млн метр куб табиий газ босимини кўтариб бериш қувватига эга. Лойиҳавий ечимга асосан 2 та агрегатлар ишчи ва 1 та агрегат захира режимида ишлайди.

Тадбирда журналистларга ушбу станциянинг кондаги қатлам босимининг табиий тушиши шароитида углеводородлар қазиб чиқариш кўрсаткичларини барқарор таъминлашдаги аҳамияти тушунтириб берилди. 

Шунингдек, кондаги мавжуд газ захираларини максимал даражада ўзлаштириш ва қудуқлардан қазиб олинаётган табиий газни кейинги босқич технологик қурилмаларига узлуксиз етказиб бериш босқичлари ҳақида маълумот берилди.

Қайд этиш жоиз, шу пайтга қадар конга қарашли 40 та қудуқдан кунига 1,8 млн куб метр газ қазиб олинаётган бўлса, станция ишга туширилгандан сўнг бу кўрсаткич кунлик 2,3 млн куб метрни ташкил қилмоқда.

 “Ўзбекнефтгаз” АЖ матбуот хизмати.