«Қозоғистонда қўшҳокимият йўқ» - Қозоғистон парламенти спикери 

Қозоғистон парламенти спикери Эрлан Кошанов собиқ президент Нурсултон Назарбоевнинг яқинда Россия пойтахтига ташриф буюриб, президент Владимир Путин билан учрашганига изоҳ берди. 

Унинг сўзларига кўра, Қозоғистонда қўшҳокимият йўқ. 

«Одамларнинг хавотирланишига асос йўқ. Биринчидан, бугунги кунда қўшҳокимият мавжуд эмас ва бўлиши ҳам мумкин эмас. Бугунги кунда барча қарорларни халқнинг мутлақ кўпчилик овози билан сайлаган давлат раҳбари Тўқаев қабул қилади. Бундан ташқари, собиқ президент давлат ишларига аралашмайди. Иккинчидан, унинг ўтказган учрашувлари ёки тадбирлари, қилган саёҳатлари, амалга ошираётган бу тадбирлар ва учрашувларнинг барчаси унинг фуқаро сифатидаги шахсий ҳуқуқидир», деди Кошанов. 

Қозоғистоннинг биринчи раҳбари россиялик ҳамкасби билан учрашиш учун Москвага учиб кетгани ҳақида 18 декабр куни хабар берилди. Россия президенти матбуот котиби Дмитрий Песков ташрифни тасдиқлаб, Путин ва Назарбоев «мутлақо шахсий учрашув» ўтказганини маълум қилди. Унда муҳокама қилинган мавзулар очиқланмади.