Шунингдек, мамлакатда коррупция ва порахўрликка ҳам барҳам берилиши таъкидланди.
Бундан буён Қирғизистонда бандит, уюшган жиноий гуруҳлар ва криминал авторитетлар бўлмайди, деди мамлакат Миллий хавфсизлик давлат қўмитаси раиси Қамчибек Ташиев.
Унинг сўзларига кўра, 2023 йилда уюшган жиноий гуруҳлар ва коррупционер мансабдор шахсларга қарши курашиш бўйича катта ишлар амалга оширилган.
«Давлатимиз қонуний, ҳуқуқий ва эркин бўлади. Агар уюшган жиноий гуруҳлар қолган бўлса, 2024 йилда ҳаммасини бутунлай йўқ қиламиз», деди Ташиев.
Шу билан бирга у «қонунга беписанд ўғри», «ҳудуд назоратчиси», «ҳукмдор» каби криминал олам тушунчалари энди қўлланмаслигини қўшимча қилди.
«Бундай сўзлар энди бўлмайди, биз улардан фойдаланишни тўхтатамиз. Озодликдан маҳрум қилиш жойларида тартиб ўрнатамиз», деди Ташиев.
У 2023 йилда коррупцияга қарши кураш яхши натижалар берганини қайд этди. Айни пайтда, Қамчибек Ташиевга кўра, давлат идораларидаги коррупцион схемалар деярли йўқ қилинган.
«Бу йўналишдаги ишлар давом этади», деб хулоса қилди у.
Шу билан бирга, Ташиев энди ҳуқуқ-тартибот ва ҳарбий соҳада порахўрликка барҳам берилишини таъкидлади.
«Биз порахўрликни бутунлай тўхтатишимиз керак. Ҳарбий кийимни кийиб, Ватанга қасамёд қилган бўлсангиз, хизматингизни қилинг. Аммо ўзингиз қонунларни бузсангиз, коррупцияга аралашсангиз, Ватанга қасамёдингизни бузасиз», деди Ташиев.
У қонунларни бузмасликка, пора олиш ва беришни бас қилишга чақирди.
«Бундан буён қонунларни бузманг. Порахўрликни бутунлай тўхтатишимиз керак, айниқса, лавозимга тайинлаш ва ротацияларда», деб қўшимча қилди у.
