НАТО ўқ-дорилар етказиб бериш бўйича миллиард евролик шартнома имзолади

Немис ва француз қурол компаниялари 220 мингта снаряд ишлаб чиқаришга буюртма олди. Дастлабки ўқ-дорилар икки йилдан сўнг етказиб берилади.

Фото: Dursun Aydemir/Anadolu/picture alliance

Россиянинг Украинага қарши уруши фонида Шимолий Атлантика алянси немис ва француз ишлаб чиқарувчилари билан 1,1 миллиард евролик ўқ-дориларни етказиб бериш бўйича шартнома имзолади. Германиянинг Junghans Microtec ва Франциянинг Nexter Munitions қурол компанияси НАТО стандарти - 155 миллиметр калибрли снарядларни етказиб беради, деди НАТО бош котиби Йенс Столтенберг 23 январ, сешанба куни Брюсселда. Бундай калибрли снарядлар, хусусан, французларнинг Caesar гаубицалари ва немисларнинг Panzerhaubitze (PhZ) 2000 ўзиюрар артиллерия мосламалари томонидан қўлланади. Иккаласи ҳам НАТО мамлакатлари томонидан Россия ҳужумини қайтариш учун Украинага етказиб берилган.

Столтенбергнинг таъкидлашича, ўқ-дорилар ҳам Украинага жўнатиш, ҳам Шимолий Атлантика иттифоқига аъзо мамлакатларнинг бўш арсеналларини тўлдириш учун керак. Ишлаб чиқарувчилар билан шартнома НАТОнинг қўллаб-қувватлаш ва харидлар агентлиги (NSPA) томонидан имзоланган. Ҳар икки компания 220 мингга яқин снаряд ишлаб чиқариши керак. Уларнинг дастлабкиси, NSPA директори Стейси Каммингс сўзларига кўра, икки йилдан кейин чиқарилади.

2024 йил бошида NSPA Германиянинг COMLOG компаниясига 1000 та Patriot (GEM-T) яхшиланган бошқарувига эга зенит ракеталарини ишлаб чиқариш ва етказиб бериш бўйича шартнома имзолади. Ушбу 5 миллиард евролик келишув NSPA’нинг энг йирик буюртмаларидан бирига айланди.