Швеция ташқи ишлар вазирлиги Орбаннинг таклифига жавобан, Венгрия аллақачон мамлакатни НАТОга расман таклиф қилгани ва музокаралар олиб бориш учун ҳеч қандай сабаб йўқлигини билдирди.
Венгрия бош вазири Виктор Орбан швед ҳамкасби Улф Кристерссонни Будапештга Швециянинг НАТОга кириш истагини муҳокама этиш учун таклиф қилди. Бу ҳақда 23 январ, сешанба куни Орбаннинг ўзи хабар берди.
«Бугун мен Швеция бош вазири Улф Кристерссонга Швециянинг НАТОга кириши бўйича музокаралар олиб бориш учун Венгрияга ташриф буюришга таклифнома юбордим», — деб ёзди у X ижтимоий тармоғида.
Швеция ташқи ишлар вазири Тобиас Билстрём таклифни изоҳлар экан, Швециянинг Венгрия билан НАТОга қўшилиш бўйича музокара олиб боришига асос йўқлигини айтди, деб ёзади AFP. 2022 йил ёзида Мадридда бўлиб ўтган иттифоқ саммитида Венгрия Швецияга ҳеч қандай шартларсиз НАТОга аъзо бўлиш таклифини расман топширди, деб эслатди Билстрём. «Шунинг учун мен бугун музокаралар олиб бориш учун ҳеч қандай сабаб кўрмаяпман», деди у.
Швециянинг аризаси ҳалигача Венгрия ва Туркия томонидан маъқулланмаган
Венгрия ва Туркия Швециянинг НАТОга аъзо бўлиш аризасини ҳали маъқулламаган ягона давлатлар бўлиб қолмоқда. Будапешт Стокҳолмни Венгрияга «туҳмат қилиш» сиёсатида ва мамлакатнинг қонун устуворлигидан оғишини мунтазам изоҳлашда айблайди, деб ёзади AFP. Венгрия «ижобий ечимга тайёргарлик кўришдан олдин Швециядан ҳурмат талаб қилиш ҳуқуқига эга», деган Орбан ўтган йили, деб эслатди AFP.
Шу билан бирга, Туркия парламенти бош ассамблеяси 23 январ, сешанба куни Швециянинг НАТОга аъзо бўлиши ҳақидаги протокол бўйича мунозарани бошлади ва шу куннинг ўзидаёқ бу масала бўйича ижобий овоз берди.
