Лойиҳанинг иштирокчи давлатлари ўртасида келишмовчиликлар юзага келгани таъкидланмоқда.
«Марказий Осиё – Хитой» газ қувурининг D (тўртинчи) линияси қурилиши лойиҳада иштирок этувчи давлатлар ўртасидаги нархлардаги келишмовчиликлар туфайли кечиктирилмоқда. Бу ҳақда Тожикистон энергетика ва сув ресурслари вазири Далер Жума хабар берди.
У Тожикистон газ қувури билан боғлиқ барча масалаларни ҳал қилганини, лойиҳанинг бошқа давлатлари ўртасида келишмовчиликлар юзага келганини таъкидлади. Бироқ вазир қайси давлатлар ўртасида келишмовчилик юзага келганига ойдинлик киритмади.
Тожикистон Энергетика вазирлиги маълумотларига кўра, газ қувури Туркманистон ва Ўзбекистон (205 км), Тожикистон (391 км), Қирғизистон (215 км) ва Хитой (155 км) ҳудуди орқали ўтади. D линиянинг умумий узунлиги 966 километрни ташкил қилади.
Лойиҳа Тожикистон ҳудудида умумий узунлиги 63,3 км бўлган 42 та тоғ туннелини ва бошқа инфратузилмаларни қуришни назарда тутади.
Ушбу газ қувури орқали Туркманистондан Хитойга йилига 25-30 миллиард куб метр табиий газ етказиб берилиши кутилмоқда. Ушбу лойиҳанинг амалга оширилиши Тожикистон иқтисодиётига 3 миллиард доллардан ортиқ Хитой сармоясини жалб қилади.
