Европа Иттифоқининг Россияга қарши санкциялари 13-пакети табиатан «рамзий» бўлади

Европа дипломатлари 13-санкция пакетини «рамзий» деб атаган, чунки у қисқа вақт ичида қабул қилинмоқда. «Кўпроқ нарсани» келишиб олиш учун эса кўпроқ вақт керак.

Фото: Reuters

Европа Иттифоқининг Россияга қарши янги, 13-санкция пакети доирасида россиялик дипломатларга аккредитациядан ўтган давлатда ҳаракатланишини чеклаш ғояси муҳокама қилинмоқда. Бу ҳақда Politico европалик дипломатга таяниб хабар берди.

Нашр бу таклифни «Чехиянинг кўп йиллик илтимоси» деб атаган. Бироқ, Politico таъкидлаганидек, ушбу чекловни жорий этиш осон бўлмайди, чунки Шенген зонасида саёҳат кўпинча ҳеч қандай тарзда назорат қилинмайди.

Санкцияларнинг 13-пакети 2024 йилнинг 24 февралига, яъни Россиянинг Украинага бостириб киришининг икки йиллигига қадар жорий этилиши режалаштирилган. У асосан Европа Иттифоқидаги активлари музлатиб қўйиладиган одамларга нисбатан янги чекловларни, шунингдек, «кўпроқ компанияларга икки мақсадли товарларни экспорт қилишни тақиқлашни» ўз ичига олади. 13-санкциялар пакетида Россия алюминийи импортига ҳеч қандай тақиқ қўйилмайди. Бироқ Европа Иттифоқининг айрим давлатлари бу масалани кейинги санкциялар пакети учун кўриб чиқмоқчи.

Нашр билан суҳбатда Европа дипломатлари 13-санкция пакетини «рамзий» деб атаган, чунки «кўпроқ нарсани» келишиб олиш учун кўпроқ вақт керак.

Ўтган йилнинг ноябрида Financial Times Европа Иттифоқи давлатлари россиялик дипломатларнинг ҳаракатига чекловлар жорий этишни муҳокама қилаётгани ҳақида ёзган эди. Чехия берган таклифда россиялик дипломатлар Шенген зонасида эмас, балки фақат мезбон давлат ҳудудида ҳаракатланиш имконини берувчи визалар ва яшаш рухсатномаларини олиши кераклиги назарда тутилган. Чехия, шунингдек, Россия дипломатларига виза ва яшаш учун рухсатнома беришда фақат сохталаштириш қийинроқ бўлган биометрик паспортларни қабул қилишни таклиф этади. Прага бу таклифни Россия разведкасининг эҳтимолий агентларига қарши кураш билан изоҳлайди.

Европа Иттифоқи расмийлари 2023 йил 18 декабрда Россияга қарши 12-санкция пакетини қабул қилди. Унда 2024 йил 1 январдан бошлаб Россия олмосларини олиб киришни тақиқлаш кўзда тутилган. Бундан ташқари, ЕИ 61 шахс ва 86 ташкилотга нисбатан шахсий чекловлар жорий қилди. Санкцияга дучор бўлган шахслар орасида Россия Хавфсизлик кенгаши раҳбари ўринбосари Дмитрий Медведевнинг ўғли Иля, Кузбасс губернаторининг рафиқаси ва Владимир Путиннинг жияни Анна Цивилева, Москва шаҳри думаси раиси Алексей Шапошников ва бошқалар бор.