“Вазирлик нуфузи бир шахс ҳаракати билан баҳоланмайди” – вазир ўринбосари хоразмлик педофил амалдор иши ҳақида

Адлия вазирлигида матбуот анжумани бўлиб ўтди. Унда вазирлик 2023 йилда амалга оширган ишлари тўғрисида маълумот берилди.  

Матбуот анжуманида иштирок этган Kun.uz мухбири вазир ўринбосари Алишер Каримовга Хоразм вилояти Адлия бошқармасининг собиқ бошлиғи Ойбек Машариповнинг жинояти вазирлик нуфузига қандай таъсир қилгани, бу каби ҳолатлар тизим ходимлари ўртасида такрорланмаслиги учун қандай чоралар кўрилгани, шунингдек, вазирлик иш бўйича чиқарилган ҳукм ва жазо чорасини қанчалик адолатли бўлди дея ҳисоблаши ҳақида савол берди.  

Алишер Каримовга кўра, Ойбек Машарипов жиноятини аввало адлия тизими ходими сифатида эмас, шахс сифатида содир қилган.

 “Бу ҳолат жамоатчилик томонидан ҳозирги кунгача муҳокама қилиняпти. Албатта, бу оқлаб бўлмайдиган ҳолат, Адлия вазирлигининг ҳар бир тизими ходимига ёмон таъсир қилди, деса ҳам бўлади. Лекин шахс у. Шахс эса ўзининг қилмиши учун ўзи қонунда белгиланган тартибда жавоб беради.

Бунақа ҳолатларга йўл қўймаслик ва олдини олиш мақсадида Адлия вазирлигида одоб-ахлоқ кодекси ишлаб чиқилган. Унда тизимдаги барча ходимларнинг ҳуқуқ ва мажбуриятлари белгилаб берилган. Бу йўналиш бўйича кўплаб ходимлар билан иш олиб бориляпти.

Вазирликнинг нуфузи битта шахснинг хатти-ҳаракати билан баҳоланмайди. Гуруч курмаксиз бўлмайди. Мана, олиб қарасангиз, давлат ташкилотларида қанча ҳолат мавжуд.

Жуда кўп ОАВ ва блогерлар томонидан адлияга урғу қаратиляпти. Бу шу тизимда фаолият юритаётган инсон сифатида бизга таъсир қилади. Лекин масаланинг иккинчи томони бор: у адлия ходими бўлгани билан давлат бериб қўйган ваколатдан келиб чиққан ҳолатда бу жиноятни содир қилгани йўқ, шахс сифатида, инсон сифатида содир қилди. Мана шу нарсага эътибор қаратишимиз керак. Бу нарсани эртага бошқаси ҳам қилиш мумкин.  

 Суднинг фаолиятига ҳеч ким аралаша олмайди. Иш апелляция тартибида ҳам қайта кўриб чиқилди, Олий суд томонидан ҳам изоҳлар берилди. Яъни ўша пайтда амал қилган қонунчилик доирасида жазо чоралари белгиланди. Ундан кейин бу масалалар бўйича қонунчиликка ўзгартиришлар киритилди. Бевосита Адлия вазирлигининг ўзи ўша қонуннинг ташаббускори бўлди. Биз ўзимиз қонун лойиҳасини ишлаб чиққандик, парламент маъқуллади, кучга кирди, жавобгарлик чоралари оширилди. Лекин ҳуқуқни қўллашда бу қилмиш содир бўлган ва аниқланган пайтдаги қонунчилик бўйича жазо тайинланади. Суднинг қабул қилган ҳукмини таҳлил қилишга бизнинг ҳаққимиз йўқ”, дея таъкидлаб ўтди вазир ўринбосари.  

Матбуот анжуманида вазирлик томонидан 2023 йилда амалга оширилган ишларга ҳам тўхталиб ўтилди.

Таъкидланишича, ўтган йилда вазирлик томонидан ҳуқуқий экспертизадан ўтказилган қонун ҳужжатлари лойиҳаларининг 543 таси ёки ҳар учтадан биттаси мақсадга мувофиқ эмас деб қайтарилган. Охирги уч йил давомида қонунчилик юкини ихчамлаштириш бўйича “Тартибга солиш гилотинаси” усули орқали 8848 та норматив ҳуқуқий ҳужжатлар бекор қилинган.

Норматив-ҳуқуқий ҳужжатларни амалиётда қўллашдаги коррупциявий хавфларнинг олдини олиш мақсадида 359 та лойиҳа ҳамда 113 та амалдаги қонун ҳужжатлари коррупцияга қарши экспертизадан ўтказилган. Натижада 582 та коррупциявий омиллар аниқланган.

 Шунингдек, давлат органларида инсон ҳуқуқлари соҳасидаги қонунчилик ҳужжатларига риоя этилиши устидан ўтказилган ўрганиш ва мониторинглар натижасида аниқланган қонунбузилишларни бартараф этиш бўйича 8 071 та тақдимнома киритилиб, 939,6 млрд сўмдан ортиқ пул маблағлари ундириб берилган. Фуқаролар манфаатларида тегишли судларга 240 млрд сўмга яқин 11 763 та даъво аризаси киритилган. 

2023 йилда давлат хизматлари марказлари томонидан 13,2 млндан ортиқ хизматлар кўрсатилган. Марказларда кўрсатиладиган давлат хизматлари турлари сони 335 тага етказилган.