Американинг Intuitive Machines компанияси модулининг қўниши режалаштирилганидек - учирилганидан бир ҳафта ўтгач содир бўлди. Бу 50 йилдан кўпроқ вақт олдин «Аполлон» дастури тугаганидан кейин АҚШнинг Ойга биринчи қўнишидир.
Америка хусусий компаниясининг тижорат Ой зонди биринчи марта Ойга қўнди. Nova-C Ойга қўнувчи қурилмаси 22 феврал, пайшанба куни Ер сунъий йўлдоши юзасига етиб борди ва у ердан сигнал узатди, деди жонли эфирда Техаснинг Intuitive Machines компанияси вакили. Бу 50 йилдан кўпроқ вақт олдин «Аполлон» дастури тугаганидан кейин АҚШнинг Ойга биринчи қўнишидир.
Nova-C 15 феврал куни Флорида штатидаги Канаверал бурнида АҚШ космодромидан SpaceX ракетаси бортида коинотга учирилди. Шу пайтгача фақат АҚШ, СССР, Хитой, Ҳиндистон ва Япониянинг давлатга қарашли космик компаниялари Ойга муваффақиятли қўнган. Хусусий компаниялар ҳеч қачон бундай ташаббусни амалга ошира олмаган.
«Одиссей» Ойда икки ҳафта қолади
«Одиссей» деб номланган Nova-C модули Ойда 14 кун давомида ишлаши кутилмоқда. Қурилма бизнесмен Илон Маскнинг SpaceX аэрокосмик компанияси Falcon-9 ракетаси орқали керакли траекторияда учирилди. Falcon-9 15 феврал куни маҳаллий вақт билан 01:05да (Тошкент вақти билан 11:05) Флорида штатидаги Канаверал бурнида Жон Кеннеди номидаги космик марказдан учирилган. Учириш дастлаб 14 феврал куни эрталаб режалаштирилган эди, бироқ техник носозлик туфайли у бир кунга қолдирилди.
Модулда фойдали юк сифатида олтита NASA тадқиқот асбоби мавжуд. Улар қўниш зонасидаги муҳитни ўрганиши, шунингдек, астронавтлар қайтиши учун йўл тайёрлайдиган тажрибалар ўтказиши керак бўлади. Бу NASA’нинг жорий йил бошидан бери Ойга қўниш модулини юборишга иккинчи уринишидир. Январ ойида Astrobotic Technology компаниясининг худди шундай миссияси муваффақиятсиз якунланди.
Ой пойгасида Россия ҳам иштирок этди. Бироқ, у учирган автоматик сайёралараро « Луна-25» станцияси 2023 йил августида Ой юзаси билан тўқнашиб кетди ва Роскосмоснинг хабар беришича, «мавжудлигини тўхтатди».
