Путин Россия ҳудудларига ҳужумларни УҚКнинг фронтдаги муваффақиятсизликлари билан изоҳлади

Украина ҳудудидан Белгород ва Курск вилоятларига ҳужумлар Украина қуролли кучлари «ўтган йили ўз олдига қўйган мақсадларидан бирортасига ҳам эриша олмагани» сабабли амалга оширилди, деди Россия президенти Владимир Путин Дмитрий Киселевга берган интервюсида. У «Россия» телеканалида 13 март, чоршанба куни эфирга узатилди. Путиннинг сўзларига кўра, «энди ташаббус бутунлай Россия армиясига ўтди».

Россия Федерацияси президентининг сўзларига кўра, ахборот таъсиридан ташқари, бу ҳаракат Россияда бўлиб ўтадиган президентлик сайловларига аралашиш ва «келажакда эҳтимолий музокаралар жараёнида қандайдир сўзини ўтказишга» қаратилган.

Путин тинчлик музокаралари ҳақида

Эҳтимолий тинчлик музокаралари ҳақида гапирар экан, Путин Россия «ҳеч қачон уларни рад этмаган», улар учун «тайёр», аммо улар «юзага келган воқеликларга асосланган бўлиши» кераклигини таъкидлади. «Россия мос келадиган ва биз ишонадиган хавфсизлик кафолатларини олиши лозим», деди у. 

Шу билан бирга, Путин «ҳеч кимга ишонмаслигини» айтди ва Ғарб қандай қилиб «Россияни кўп марта алдаганини» яна бир бор эслатди - НАТОни Шарққа кенгайтирмаслик, сиёсий муаммоларни тинч йўл билан ҳал қилиш, 2014 йилда Украинадаги можаро ва Минск келишувларига риоя қилиш масаласида. 

Франция президенти Эммануэл Макроннинг Украинага Ғарб қўшинларини юбориш эҳтимоли ҳақидаги сўзларига изоҳ берар экан, Путин «Ғарб давлатларининг ҳарбийлари ҳатто Янукович даврида ҳам Украинада бўлган», 2014 йилдан кейин эса улар сони бир неча баробарга ошганини айтди. Шу билан бирга, Путин «хорижий давлатларнинг расмий ҳарбий контингентини Украинага юбориш жанг майдонидаги вазиятни ўзгартирмаслиги, Ғарб давлатлари томонидан Украина қуролли кучларига қурол етказиб бериш ҳам ҳеч нарсани ўзгартира олмагани»ни айтди.

Путин: TAURUS ракеталари етказиб берилиши фронтдаги вазиятни ўзгартирмайди

Германия Украинага узоқ масофага учувчи TAURUS ракеталарини етказиб бериш мумкинлиги ҳақидаги мунозараларга ишора қилиб, Путин немислар «хаёл қилаётгани, ўзини ўзи руҳлантираётгани», шунингдек, Россияни «қўрқитишга» ҳаракат қилаётганини айтди.

Путиннинг сўзларига кўра, TAURUS ракеталари етказиб берилса, бу Украина қуролли кучларига ёрдам бермайди, чунки улар аллақачон «Британия ва Америка ракеталаридан фойдаланмоқда», аммо «бу жанг майдонидаги вазиятни ўзгартирмаяпти».

«АҚШ эртагаёқ ядровий урушни бошлашга тайёр эмас» 

Ядро уруши хавфи ҳақида сўралганда, Путин Россия «ҳарбий-техник нуқтайи назардан бунга тайёр», бу «қўшиннинг тури, тармоғи доимий жанговар шай ҳолатда» эканлигини айтди. Унинг фикрича, Россия ядровий триадаси Қўшма Штатларникига қараганда «замонавийроқ». Америкаликлар энди ядро қуролларини модернизация қилишга, «барча таркибий қисмларини ишлаб чиқишга» ҳаракат қилмоқда, аммо «бу улар эртагаёқ ядро урушини бошлашга тайёр дегани эмас», деди Россия президенти. 

Путиннинг сўзларига кўра, Россия ядровий синовларни тақиқлаш тўғрисидаги шартномани ратификация қилишдан қайтган, чунки АҚШ уни ратификация қилмади, бироқ Москва бу келишувларга амал қилади. «Агар америкаликлар бундай синовларни ўтказса, биз ҳам шундай қилишимиз мумкинлигини истисно этиб бўлмайди», деди у.

Путин, шунингдек, шу пайтгача Украинада тактик ядро қуролини қўллаш зарурати йўқлигини айтди. Унинг сўзларига кўра, бу қуроллардан Россия давлати мавжудлиги ҳақида гап кетганда фойдаланиш мумкин.