Россия Адлия вазирлиги яна беш кишини «чет эл агентлари» реестрига киритди

Уч журналист, ҳуқуқ ҳимоячиси ва муниципал депутат - Россия Адлия вазирлигининг «чет эл агентлари» рўйхатини кенгайтириш бўйича жума кунги навбатдаги йиғилиши натижаси.

Фото: Bulkin Sergey/Global Look Press

Россия Адлия вазирлиги 12 апрел, жума куни кечқурун «чет эл агентлари» деб аталувчи реестрга журналистлар Иля Барабанов, Ася Казанцева ва Иван Филиппов, ҳуқуқ ҳимоячиси Иван Асташин ҳамда Псков вилоятидаги Завеличенская волостидан «Яблоко» партияси депутати Николай Кузминни киритди. Рўйхатга журналист 2023 йил ёзидаёқ чет эл агенти сифатида тан олинган Андрей Караулов асос солган «Иноагент АВК» МЧЖ ҳам киритилган.

«Медуза» таъкидлашича, яқинда Денис Коротков билан ҳаммуаллифлик қилган Иля Барабанов «Вагнер» ХҲК ҳақидаги китобини нашр этди. Адлия вазирлигининг расмий сайтидаги баёнотда айтилишича, журналист урушга қарши чиққан, шунингдек, Россия Федерацияси ҳукумати томонидан қабул қилинган қарорлар ва олиб борилаётган сиёсат ҳақида «нотўғри маълумот» тарқатган.

Россияда «чет эл агентлари» тўғрисидаги қонун

Россияда «чет эл агентлари» тўғрисидаги қонун 2012 йилда пайдо бўлган. Ўшандан бери бир неча юзлаб ташкилотлар ва шахслар тақиқ рўйхатига киритилди. Жисмоний шахслар – «чет эл агентлари» реестри 2022 йил апрел ойи бошида ишга туширилган бўлиб, у ННТлар – «чет эл агентлари», ОАВ – «чет эл агентлари» ва рўйхатдан ўтмаган ташкилотлар – «чет эл агентлари» рўйхати билан бир қаторда тўртинчи рўйхат бўлди.

2022 йил декабр ойидан бошлаб қонун Россия расмийларига кўра, «чет элдан ёрдам оладиган» ва «хорижий таъсир остида» бўлганларни «чет эл агентлари» деб эълон қилиш имконини беради.

Давлат думаси аввалроқ «чет эл агентлари» учун рекламани тақиқловчи қонунни қабул қилди

2024 йил феврал ойининг охирида Давлат думаси «чет эл агентлари» учун рекламани тақиқловчи қонунни қабул қилди. Унга кўра, ташкилотларга Россия расмийлари томонидан «чет эл агенти» деб тан олинган ҳар қандай шахсни реклама қилиш ва уларнинг ресурсларида ўзини реклама қилиш тақиқланади. Тақиқни бузганлик учун жисмоний шахслар учун 50 минг рублгача ва юридик шахслар учун 500 минг рублгача жарима солинади.

11 март куни Россия президенти Путин Россия фуқаролари ва компанияларига «чет эл агентлари» ресурсларида – уларнинг сайтларида, ижтимоий тармоқларида, блогларида ва бошқа платформаларида реклама жойлаштиришни тақиқловчи қонунни имзолади. Ҳужжат, шунингдек, оммавий ахборот воситалари ва интернетда «чет эл агентлари»нинг ўз ресурсларини реклама қилишни тақиқлайди.

2 апрел куни «чет эл агентлари»нинг сайловларда иштирок этишини тақиқловчи қонун лойиҳаси Давлат думасига кўриб чиқиш учун киритилди.