Британия: Россия Украинадаги уруш учун хорижликларни ёллашда давом этмоқда

Чет эл фуқаролари Россия паспорти, бепул тиббий ёрдам ва ойлик 2200 доллар маош ваъдаси билан ҳарбий хизматга жалб қилинмоқда, дея маълум қилди Британия Мудофаа вазирлиги.

Фото: Sergey Pivovarov/REUTERS

Россия Украинага қарши урушда қатнашиш учун хорижий фуқароларни ҳарбий хизматга жалб этишда давом этмоқда. Британия Мудофаа вазирлиги 15 апрел, душанба куни хабар беришича, уларга катта пул мукофоти ва Россия паспорти эвазига Россия Қуролли кучларининг «махсус бўлинмалари» сафига қўшилиш таклиф этиляпти.

Британия Мудофаа вазирлиги хабарида хорижликларга 2200 доллар ойлик маош, 2000 доллар миқдорида бир марталик тўлов, Россия паспорти, бепул тиббий хизмат ва ўқитиш таклиф қилинган инглиз тилидаги брошюрадан иқтибос келтирилади.

Лондонга кўра, бундай реклама профессионал аскарлар учун эмас, балки аввалроқ алданиб, Россия армиясига қўшилган муҳожирларга қаратилган. Шу билан бирга, уларни «махсус» эмас, балки оддий бўлинмаларга бирлаштириш режалари бор. «Россия, эҳтимол, ўз уйида машҳур бўлмаган сафарбарлик чораларини қўллашдан қочишни хоҳлаяпти - кунига ўртача 913 аскар - Россия Федерацияси ўз қуролли кучлари сонини кўпайтириш учун янги имкониятларни ўрганмоқда», деб таъкидлади ҳарбий департамент.

Россия Мудофаа вазирлиги асосий мақсади - қўшни давлатлардан келган меҳнат муҳожирлари

Британия разведкаси маълумотларига кўра, 2023 йил ўрталарида интернетнинг Россия сегментида Марказий Осиё давлатларидан меҳнат муҳожирларини ёллаш бўйича онлайн эълонлар берилган. Уларда ойлик маош таклифи 1973 доллар ва тўловлар 5140 долларни ташкил қилган.

2023 йил 15 май куни Россия президенти Владимир Путин Украинадаги уруш пайтида Мудофаа вазирлиги билан бир йиллик шартнома тузган хорижликларнинг Россия фуқаролигини соддалаштирилган ҳолда олиши ҳақидаги фармонни имзолади. Шундан сўнг Россия фуқаролигини олиш учун ариза берган муҳожирларни ҳарбий хизматга қабул қилиш ва ҳарбий хизматни ўташ учун шартнома тузишга мажбурлаш ҳолатлари кўпайди. Бир кун аввал ОАВда Ҳиндистон ва Непал фуқаролари ҳам Россия армиясига жалб қилиниб, кейин фронтга жўнатилаётгани ҳақида хабарлар тарқалган эди.

Марказий Осиёнинг барча мамлакатларида, истисносиз, чет давлат армиясида хизмат қилиш ёлланма ҳарбийлик фаолияти моддасига кирувчи жиноят ҳисобланади. Шу боис Россия Мудофаа вазирлиги билан шартнома имзолашга рози бўлган муҳожирлар ватанига қайтган тақдирда жиноий жавобгарликка тортилади. Ушбу модда бўйича қамоқ жазоси Тожикистонда 5 йилдан 12 йилгача, Ўзбекистонда 5 йилдан 10 йилгача, Қирғизистонда 10 йилдан 12 йилгача бўлган муддатни ташкил этади.