Еврокенгаш Россия ва Беларусдан қишлоқ хўжалиги товарларига божларни тасдиқлади

ЕИ саммитида Россия Федерацияси ва Беларусдан ғалла, ёғ маҳсулотлари, буғдой, маккажўхори ва кунгабоқарни Европа Иттифоқига импорт қилиш бўйича бож тўловлари тасдиқланди. Улар Европа Иттифоқи кенгаши томонидан қабул қилингандан кейин киритилади.

Европа кенгаши 18 апрел, пайшанба куни Брюсселда бўлиб ўтган махсус саммитида ЕИ кенгаши ва Европа комиссиясини Европа Иттифоқига Россия ва Беларус қишлоқ хўжалиги маҳсулотлари импортининг айрим турларига қўшимча божлар жорий этиш бўйича ишларни давом эттиришга чақирди. Бу ҳақда Европа кенгаши ва ЕИ кенгаши сайтида эълон қилинган саммитнинг якуний ҳужжатида айтилади. Шу билан бирга, Европа Иттифоқи ва унга аъзо давлатлар раҳбарлари «бу ушбу товарларнинг ривожланаётган мамлакатларга транзитига таъсир қилмаслигини» таъминлаш кераклигини таъкидлади.

22 март куни Еврокомиссия Россия ва Беларусдан ғалла, ёғ маҳсулотлари, буғдой, маккажўхори ва кунгабоқарни Европа Иттифоқига импорт қилиш бўйича божларни ошириш таклифини киритди. «Бу Россия донининг Европа Иттифоқи бозорини ушбу маҳсулотлар учун беқарорлаштиришига йўл қўймайди, Россиянинг ушбу маҳсулотларни ЕИга экспорт қилишдан тушган даромаддан фойдаланишига имкон бермайди ва ўғирланган Украина донининг Россиядан ноқонуний экспорти Европа Иттифоқи бозорига кирмаслигини таъминлайди», деди Еврокомиссия раҳбари Урсула фон дер Ляйен 21 март куни Европа кенгаши йиғилишидан кейин.

Евроиттифоқ фермерлари бозордаги беқарорлик хавфидан хавотирда

Брюссел маълумотларига кўра, Европа Иттифоқи фермерлар ҳамжамияти Россия дон маҳсулотларининг потенциал сезиларли даражада кўпайиши натижасида Европа Иттифоқи бозорининг беқарорлашуви хавфи ҳақида ташвиш билдирди. «Россиянинг дунёдаги етакчи дон экспортчиси сифатидаги роли ва озиқ-овқат экспортидан геосиёсий восита сифатида фойдаланишга тайёрлигини кўрсатди», дейилади Европа комиссияси веб-сайтида.

2023 йилда Россия Европа Иттифоқига қарийб 1,3 миллиард евролик маҳсулот экспорт қилди. Европа Иттифоқи тарифлари Россия иқтисоди ҳамда ҳарбий машинасини яна бир фойда манбасидан маҳрум қилади, дея маълумот берди Брюссел.

Тарифни ошириш Россия Федерацияси билан яқин алоқаларини ҳисобга олган ҳолда Беларусга ҳам тегишли. «Бундан ташқари, янги чорани Беларусга қўллаш орқали Европа Иттифоқи Россияга Беларусдан янги тарифларни четлаб ўтиш ва ўз товарларини ЕИ бозорига жўнатиш учун фойдаланишга рухсат бермайди», - дея маълум қилди Еврокомиссия.

Ушбу таклиф энди Европа Иттифоқи кенгаши томонидан кўриб чиқилади ва у қабул қилингандан сўнг дарҳол кучга киради.