Жаҳон | 10:56 / 03.06.2024
3603
4 дақиқада ўқилади

Хитой Мудофаа вазирлиги Тайван мустақиллигини чеклаш билан таҳдид қилмоқда

Хитой Тайван мустақиллигини чеклаш учун «қатъий чоралар» кўради, деди Хитой Мудофаа вазирлиги раҳбари.

Дун Цзюн Фото: Vincent Thian/AP Photo/picture alliance

Ташқи кучлар ва «сепаратчилар» Тайваннинг Хитой билан тинч йўл билан «қайта бирлашиши» истиқболига тобора «зарар етказмоқда» ва Пекин уларнинг ҳаракатларига барҳам бериш учун «қатъий чоралар» кўришга тайёр. Бу ҳақда Хитой Мудофаа вазирлиги раҳбари Дун Цзюн 2 июн, якшанба куни Сингапурда бўлиб ўтган йиллик хавфсизлик бўйича «Шангри-Ла мулоқоти» форумида сўзлаган нутқида айтиб ўтди, дея хабар беради Reuters агентлиги.

Хитой вазири сўзларига кўра, Тайваннинг ҳукмрон Демократик прогрессив партияси «аста-секинлик билан сепаратизмга интилмоқда ва Хитой ўзлигини йўқ қилишга интилмоқда». «Бу айирмачилар яқинда Хитой халқи ва аждодларига хиёнат қилишларини кўрсатувчи фанатик баёнотлар билан чиқишди. Улар тарихда қораланади», - деди Дун. 

ХХР Мудофаа вазирлиги раҳбарининг қўшимча қилишича, Хитой Тайван билан тинч йўл орқали «қайта бирлашишга» содиқ бўлса-да, ХХР армияси бу масалани якуний ҳал этишда «кучли куч бўлиб қолади». Бундан ташқари, Дун хорижий кучларни мамлакатнинг «ички ишларига» аралашишда ва «бўлгинчиларни рағбатлантиришда» айблади. «Биз Тайван мустақиллигини чеклаш учун қатъий чоралар кўрамиз ва у ҳеч қачон муваффақиятли бўлмаслигини таъминлаймиз», деди у. «Биз Тайван мустақиллигини чеклаш қобилиятимизга ишонамиз». 

Хитой расмийлари Пекин Тайванни исёнкор провинция деб билишини, агар керак бўлса, ҳарбий куч ёрдамида Хитойга қайтарилиши кераклигини бир неча бор таъкидлаган. Орол ҳукумати 1949 йилда фуқаролик уруши тугаганидан кейин материк Хитойдан мустақиллигини эълон қилди, аммо Тайванни фақат Палау, Тувалу ва Белиз каби ўнга яқин давлат суверен мамлакат сифатида тан олди. 

Хитой президент инаугурациясига жавобан Тайван яқинида ҳарбий машғулотлар ўтказди

20 май куни бўлиб ўтган инаугурация маросимида йил бошида сайланган Тайван президенти Лай Циндэ ўзининг мустақиллик йўлини тасдиқлади. «Мен Хитойни Тайванни сиёсий ҳарбий воситалар билан қўрқитишни бас қилишга ва Тайван бўғозининг ҳар икки томонида ҳамда бутун минтақада тинчлик ва барқарорликни сақлаш учун Тайван билан глобал масъулиятни ўз зиммасига олишга чақирмоқчиман», - деди Лай Циндэ инаугурация пайтида. 

«Сепаратчиларнинг сўзларига» жавобан Хитой Тайван яқинида ҳарбий машғулотлар ўтказди, унда 111 самолёт ва ўнлаб кемалар қатнашди. Тайбэй бу манёврларни мавжуд дунё тартибига қарши «ошкора провокация» деб атади. 

Тайван президенти маъмурияти Хитой вазирининг форумдаги сўзларига жавоб бериб, Дун Тайван ҳукумати позициясини бузиб кўрсатганини айтди. «Хитой Тайван ҳукумати билан мулоқот қилиш учун ишончга эга эмас ва унинг мантиқсиз баёнотлари халқаро миқёсда тан олинмайди», дейилади идора баёнотида. 

Тайван расмийларига конференцияга ўз вакилларини юборишга рухсат берилмади - Пекин жаҳон ҳамжамиятидан «ягона Хитой сиёсати» тамойилларига риоя қилишни талаб этмоқда, бу Пекиннинг розилигисиз Тайбэй билан халқаро расмий алоқаларни назарда тутмайди. 

Мавзуга оид