Венгрия бош вазири НАТОнинг Украинага ёрдамини блокламасликка ваъда берди

Венгрия НАТОнинг Украинага режалаштирилган кўмагини кенгайтиришда иштирок этмайди, лекин бу лойиҳага аралашмайди, деди Венгриянинг ўнг қанот популистик ҳукумати раҳбари Виктор Орбан 12 июн, чоршанба куни алянс бош котиби Йенс Столтенберг билан учрашувдан сўнг.

НАТО бош котиби келишувга эришилганидан мамнун эканини таъкидлади. Венгрия ходимларининг ҳеч бири алянснинг Украинага ёрдам бериш режаларида иштирок этмайди, Венгриядан молиявий ёрдам ҳам бўлмайди. Столтенберг таъкидлаганидек, Орбан уни «бу саъй-ҳаракатларга қарши чиқмаслигига ва бошқа иттифоқчиларга олдинга силжиш имкониятини беришига» ишонтирди.

Будапешт бир неча бор Киевга ҳарбий ва молиявий ёрдам кўрсатишга тўсқинлик қилган

«Венгрия НАТОнинг бошқа аъзо давлатлар томонидан қўллаб-қувватланадиган қарорларини блоклашни истамайди», деди Орбан ўз навбатида. Венгриянинг Россия Украинага қарши урушида қандай қилиб тинчликка эришиш бўйича позицияси иттифоқдаги бошқа давлатларнинг қарашларидан фарқ қилади, аммо Будапешт «бизникидан фарқ қиладиган фикрларнинг оғирлиги ва сони муҳимлигини» тушунади ҳамда Венгрия буни ўзгартира олмайди, дея қўшимча қилди у. Аввалроқ Орбан ҳукумати Украинага ҳарбий ва молиявий ёрдам кўрсатишга бир неча бор тўсиқ қўйган эди.

НАТОнинг янги миссияси, биринчи навбатда, Киевга қурол етказиб беришни халқаро даражада мувофиқлаштириш ва украиналик ҳарбий хизматчиларни тайёрлаш билан боғлиқ. Бу лойиҳа июл ойида Вашингтонда бўлиб ўтадиган навбатдаги иттифоқ саммитида тақдим этилиши мумкин. Ташаббус, шунингдек, Доналд Трампнинг АҚШ президентлигига қайтиши эҳтимоли фонида ўзига хос эҳтиёт чораси сифатида ҳам кўрилмоқда. Республикачининг ўтмишдаги баёнотлари Қўшма Штатлар, агар у қайта сайланса, Россия ҳарбий аралашувидан ўзини ҳимоя қилаётган Украинани қўллаб-қувватлашда давом этиши борасида шубҳалар келтириб чиқарди.