Байденнинг оиласи унинг пойгадан чиқишини муҳокама қилмоқда, Оқ уй буни рад этди

Янги муддатга ўз номзодини қўйган АҚШ президенти Жо Байденнинг оила аъзолари унинг сайловолди кампаниясидан воз кечиш эҳтимолини муҳокама қила бошлади, деб хабар берди NBC News манбаларга таяниб.

Телеканал суҳбатдошларининг таъкидлашича, 81 ёшли Байденнинг оиласи унинг янги президентлик муддатига номзодини қўйишдан бош тортиши қандай бўлиши мумкинлигини муҳокама қилган. Манбаларнинг таъкидлашича, ҳар қандай режа Демократик партияни Республикачилардан номзод Доналд Трампни мағлуб этиш учун энг қулай позицияга келтириши лозим. Бундан ташқари, режа Байденнинг сиёсат соҳасидаги 50 йилдан ортиқ меҳнатига муносиб бўлиши керак.

Муҳокама марказида биринчи хоним Жилл Байден, президентнинг ўғли Ҳантер Байден ва синглиси Валери Оуэнс, шунингдек, бир қанча яқин ёрдамчилар бор.

Оқ уй матбуот котиби Эндрю Бейтс Байденнинг оила аъзолари бундай суҳбатлар ўтказаётганини рад этди. Унга кўра, бундай баёнотлар билан чиққан одамлар Байден оиласи ёки унинг жамоаси номидан гапирмаяпти.

NBC News манбасининг айтишича, Оқ уйнинг юқори мартабали амалдорлари ўртасида Байденнинг президентлик пойгасидан чиқиши учун мос режани қандай ишлаб чиқиш ҳақида ҳам суҳбатлар бўлган. Оқ уй матбуот котиби бундай суҳбатлар бўлаётганини рад этди.

Телеканалнинг қайд этишича, АҚШ президентининг айрим иттифоқчилари Байден яқин кунларда сайловолди кампаниясидан чиқиши мумкинлигини тан олмоқда. Шу билан бирга, телеканал Байденнинг ўзи ҳам сайловда ғалаба қозониш ниятида эканини бир неча бор айтганини таъкидлайди.

АҚШ президенти Жо Байден 27 июн куни Доналд Трампга қарши биринчи сайловолди дебатида муваффақиятсизликка учради. Шундан сўнг Байден вакили бўлган Демократик партия вакиллари уни сайловолди пойгасидан воз кечишга чақира бошладилар. Байден бунга жавобан ноябр ойидаги сайловларда иштирок этиши ва ғалаба қозонишини кутаётганини айтди. Демократик партиянинг бир неча юқори мартабали аъзолари Axios нашрига Байден 20-21 июл кунлари президентлик пойгасидан чиқиб кетиши мумкинлигини айтди.