Блинкен Эрон ядро қуроли учун материаллар ишлаб чиқаришга яқинлашганини айтди

Эрон ядровий қурол ишлаб чиқариш учун материаллар олиш имкониятига яқинлашмоқда, ҳозир бу бир-икки ҳафта ичида юз бериши мумкин. Бу ҳақда АҚШ Давлат котиби Энтони Блинкен маълум қилди.

«Ядровий келишувдан воз кечилгани туфайли, биз Эроннинг ядровий қурол материаллари ишлаб чиқариш имкониятига эга бўлишига йиллар эмас, балки бир-икки ҳафта қолгани ҳақида гапиряпмиз», деди Блинкен Колорадо штатининг Аспен шаҳрида бўлиб ўтган хавфсизлик форумида.

У АҚШ Эроннинг ядро қуролига эга бўлишига йўл қўймаслигини таъкидлаб, Вашингтон бу масалани дипломатик йўл билан ҳал қилишни маъқул кўришини таъкидлади.

Блинкеннинг қўшимча қилишича, Эрон ҳали ядро қуролини ишлаб чиқармаган бўлса-да, Қўшма Штатлар Теҳронга уни «секинлаштириши» учун босим ўтказиши керак.

«Агар Эрон ҳамкорликка жиддий ёндашса, ядровий дастур бўйича ишлардан воз кечиши керак», деди давлат котиби.

2015 йилда халқаро воситачилар (Буюк Британия, Германия, Хитой, Россия, АҚШ, Франция) ва Эрон ядровий дастурини чеклаш эвазига Теҳронга қарши санкцияларни бекор қилишни кўзда тутувчи Қўшма кенг қамровли ҳаракатлар режасини имзоладилар. 2018 йил май ойида АҚШ президенти Доналд Трамп ушбу кеилшувдан чиқди ва Эронга қарши бир томонлама санкцияларни тиклади. Бунга жавобан Теҳрон келишувдаги ядро дастурини чеклаш бўйича ўз мажбуриятларини босқичма-босқич қисқартира бошлади.

Кейинчалик АҚШ президенти Жо Байден маълум шартлар остида ядровий келишувга қайтишга тайёрлигини маълум қилди.

Ўтган йилнинг декабр ойида АЭХА Эрон ўзининг бойитилган уран захирасини кўпайтириб бораётгани ҳақида ҳисобот эълон қилди.