Россияда «чет эл агентлари» ёзувлари репости учун жарима қўлланиши мумкин

Россия Адлия вазирлиги жисмоний шахсларга тегишли белгиларсиз «чет эл агентлари» деб эълон қилинган нашрлар материалларини қайта жойлаштириш учун маъмурий жавобгарлик тўғрисида огоҳлантиришлар юборишни бошлади. Худди шундай хабарномалар аллақачон петербурглик адвокат Виктор Дроздов ва волгоградлик юрист Роман Мелниченко, шунингдек, журналист Кирилл Кривошеев томонидан олинган.

22 июл, душанба куни Мелниченко ўзининг Telegram-каналида Адлия вазирлигининг 10 июлдаги огоҳлантиришини эълон қилди. Унда департамент Россия Федерациясида «чет эл агенти» деб тан олинган, «чет эл агентлари» реестрига киритилган SotaVision нашрининг мақомини кўрсатмасдан қилинган репост ҳақида маълумот берган. Материалда 2024 йил мартида мухолифатчи Алексей Навалнийнинг ўлимидан сўнг сиёсий қатағон қурбонлари ёдгорлиги пойига гул қўйган адвокат ва Волгограднинг бошқа аҳолиси таъқиб қилингани ҳақида сўз боради. 

Роман Мелниченкога 2024 йил 27 сентябрга қадар «юқорида кўрсатилган қоидабузарликни бартараф этиш» ва бу ҳақда Адлия вазирлигига хабар бериш мажбурияти юкланди. Акс ҳолда, жарима қўлланади. Департамент қоидабузарликни қандай бартараф этиш таклиф қилинаётганига аниқлик киритмаган. Репост қилишда «чет эл агенти» белгисини қўшиш мумкин эмас, шунинг учун фақат ўчириш керак.

Яна кимлар огоҳлантириш олди?

Шу куниёқ худди шундай хат Кирилл Кривошеевга ҳам юборилгани маълум бўлди. Департаментнинг даъволари журналист ўзининг Telegram-каналида Озарбойжон ҳукумати Тоғли Қорабоғга уни 30 йил аввал тарк этган одамларни қандай қилиб қайтаришга уринаётгани ҳақидаги «Холод» нашридаги мақолани қайта жойлагани билан боғлиқ. Бундан ташқари, ушбу материал муаллифи Кривошеевнинг ўзи. Душанба куни «Холод»  нашрига берган изоҳида Кривошеев нашрни таҳрир қилишини айтди ва «чет эл агент» мақоми ҳақида маълумотни қўшиб қўйишини билдирди. 

Бир неча кун олдин Виктор Дроздов Адлия вазирлигининг худди шундай огоҳлантириши ҳақида маълум қилди. 2023 йил декабр ойида адвокат ўзининг Telegram-каналида The Moscow Times газетасининг Россия Марказий банки ваколатларини кенгайтириш ҳақидаги материални ушбу нашр «чет эл агенти» сифатида тан олинганини кўрсатмасдан қайта жойлаштирган.

Юрист Михаил Беняш ёзишича, Дроздов, Мелниченко ва Кривошеевга йўлланган мактублар Адлия вазирлигининг «чет эл агентлари» деб эълон қилинган нашрлардан репостлар бўйича биринчи огоҳлантиришидир. «Адлия вазирлиги бундай мактубларни юборишни бошлаши бир йил олдин муҳокама қилинган ва энди биринчи ишлар бошланди», деди адвокат.