Россияда мигрантларни ёллаганлик учун бизнесга “вазнли” солиқ жорий этиш таклиф қилинди

Россияда мигрантларни ёллаб ишлатишни афзал билувчи иш берувчилар учун махсус солиқ жорий этилиши керак, деган Россия Тергов қўмитаси раиси Александр Бастрикин“Российская газета”га берган интервюсида.

“Россия меҳнат ресурсларидан фойдаланаётган ишбилармонларни иқтисодий жиҳатдан рағбатлантиришимиз ва хорижий фуқаролардан иборат ишчи кучидан фойдаланганлик учун вазнли солиқ назарда тутилиши керак”, — деган Бастрикин. Бироқ у аниқ рақамлар келтирмаган.

У шунингдек, меҳнат мигрантларини тураржой билан таъминлаш ва уларнинг транспорт харажатларини қоплаб беришга чақирган. Бундан ташқари, бизнес қонунни бузган чет эллик ишчи мамлакатдан чиқариб юбориладиган ҳоллар учун молиявий депозит яратиши керак деб ҳисоблайди. 

Бастрикин меҳнат мигрантлари ўрнига Россия фуқароларини ишга олиш бўйича йўл харитаси ишлаб чиқиш муҳим деб ҳисоблайди. Бу ҳолатда РФ фуқаролари “ижтимоий-меҳнат кафолатларининг юқори даражаси” билан таъминланиши назарда тутилади. Унинг сўзларига кўра, бу ғояни амалга ошириш учун фуқароларга расман мамлакат ичидаги муайян объектга бориб, иш ўрни ва тураржой билан таъминланишини назарда тутувчи дастур яратилиши керак.

Бастрикин Россия иқтисодиётининг мигрантларга реал эҳтиёжини таҳлил қилиб чиқиб, мамлакатга ишлаш учун келган чет элликлар сонини аниқлаштиришни таклиф этган. Тергов қўмитаси раҳбарининг фикрича, бу “давлатнинг ички барқарорлигига таҳдид солувчи омилларни бартараф этиш учун таъсирли чоралар” ишлаб чиқиш имконини беради.

Бастрикин бу ва бошқа ташаббусларини РФ Давлат думаси спикери Вячеслав Володинга 16 июл куни йўналтирганини айтиб ўтган.

Унга кўра, ўтган 4 ой ичида Москвага 1,2 млн, Санкт-Петербургга 860 мигрант келган.

Россияда инсон ҳуқуқлари бўйича вакил Татяна Москалкова 2023 йилда Россияга МДҲ давлатларидан 9,9 млн мигрант кириб келгани, уларнинг 8,5 млни ҳисобга қўйилганини айтган эди.