Туркия ва Сурия сўнгги ўн йил ичида Эрдўған ва Асад ўртасидаги илк учрашувга тайёрланмоқда — ОАВ

Сўнгги бир ой ичида Туркия ва Сурия махсус хизматлари вакиллари президентлар Ражаб Тоййиб Эрдўған ва Башар Асад ўртасида учрашув ташкил этиш бўйича музокараларнинг уч раундини ўтказди.

Turkiye газетасининг хабар беришича, икки давлат раҳбарлари 2011 йилдан бери илк бор август ойида чегара пунктида учрашиши мумкинлиги тахмин қилинмоқда. Газета суҳбатдошлари учрашувнинг кутилаётган санасини айтмаган.

Таъкидланишича, учрашувга тайёргарлик жараёни «жуда тез кетмоқда». Нашрнинг ёзишича, учрашувда Владимир Путин ҳам иштирок этиши мумкин. Кремл ҳозирча бу маълумотга изоҳ бермади.

24 июл куни Туркия ташқи ишлар вазири Хоқон Фидон Эрдўған ва Асад ўртасидаги учрашувни ташкил этиш устида ишлаётганини айтди, бироқ аниқ бирор нарса ҳақида гапиришга ҳали эрта эканлигини таъкидлади.

Асад туркиялик ҳамкасби билан «мамлакат манфаатларига жавоб берадиган» учрашувга тайёр эканини айтди. Туркия президенти Владимир Путин ва Башар Асад билан учтомонлама музокара ўтказилишини рад қилмади.