АҚШ Японияда қўшма кучлар қўмондонлигини тузади

Япония ва АҚШ мудофаа ва хавфсизлик соҳасидаги ҳамкорликни кенгайтирмоқда. 28 июл, якшанба куни Токиода «2+2» форматида бўлиб ўтган учрашув якунлари бўйича эълон қилинган баёнотга кўра, Японияда АҚШ қўмондонлиги остида янги қўшма кучлар штаби ташкил этилади, унга 54 минг аскардан иборат оператив қўмондонлик берилади. АҚШ давлат котиби Энтони Блинкен, Пентагон раҳбари Ллойд Остин, Япония ташқи ишлар ва мудофаа вазирлари Ёко Камикава ва Минору Кихара учрашувда иштирок этди.

Бу қарор Тайван атрофида ва Корея яриморолида инқироз авж олган тақдирда икки давлат армиясини янада мослашувчан қилиши кутилмоқда. Айни пайтда Япониядаги АҚШ қўшинлари Ҳавайидаги Ҳинд-Тинч океани қўмондонлигига бўйсунади, у 19 соатлик вақт фарқи билан 6500 км узоқликда жойлашган.

Россия ва Хитойнинг ҳаракатларини танқид қилиш

Бундан ташқари, АҚШ ва Япония вакиллари Россия Федерацияси ва Хитойнинг ҳарбий соҳадаги ҳаракатларини қаттиқ танқид қилди. Баёнотда Россиянинг «Хитой Халқ Республикаси билан ўсиб бораётган ва провокацион стратегик ҳарбий ҳамкорлиги», жумладан, Японияга яқин жойда қўшма амалиёт ва машқлар ўтказаётгани ҳамда Хитойнинг Россия мудофаа саноати базасини қўллаб-қувватлаётганига ишора қилинади.

Шу билан бирга, Пекиннинг ташқи сиёсати «халқаро тартибни ўз манфаатлари йўлида бошқалар ҳисобига ўзгартиришга қаратилган», деб таъкидлади Америка ва Япония вазирлари. Баёнотда, шунингдек, Хитойнинг «ўз ниятлари ҳақида ҳеч қандай шаффофликсиз давом этаётган ядро арсеналини тез суръатлар билан кенгайтириши ва ХХР буни оммага очиқ бўлган далилларга қарамай тан олишдан бош тортаётганидан» хавотир билдирилган.

Бундан ташқари, вазирлар «Россия ва Шимолий Корея ўртасидаги ҳамкорликнинг чуқурлашишини кескин қораладилар», Россиянинг Украинага қарши фойдаланиш учун Шимолий Кореядан баллистик ракеталарни сотиб олгани, бу «БМТ Хавфсизлик кенгаши резолюцияларининг тўғридан тўғри бузилиши» эканлигини таъкидладилар. Шу билан бирга, АҚШ-Япония иттифоқи «Ҳинд-Тинч океани минтақасида ва ундан ташқарида тинчлик, хавфсизлик ва фаровонликнинг тамал тошидир», деб таъкидлади йиғилиш иштирокчилари.

Япония, АҚШ ва Жанубий Корея ўртасидаги ҳамкорлик меморандуми

«2-2» форматидаги учрашув олдидан Жанубий Корея мудофаа вазири Шин Вон Сик иштирокида уч томонлама музокаралар бўлиб ўтди, унинг давомида хавфсизлик соҳасида ҳамкорликни чуқурлаштириш бўйича меморандум имзоланди. Ҳужжатда, жумладан, ҳар йили уч томонлама маслаҳатлашувлар ўтказиш ва КХДРнинг оммавий қирғин қуролларини яратиш дастури бўйича маълумотлар алмашиш белгиланган. Кейинги учрашув 2025 йилда Сеулда бўлиб ўтади, деди Япония мудофаа вазири Минору Кихара.