Италияда тадбиркор Алексей Федоричевнинг активлари хатловга олинди

Италия солиқ полицияси «Монако» баскетбол клуби президенти ва Россиянинг «Динамо» футбол клуби собиқ хўжайини Алексей Федоричевга тегишли бўлган Флоренцияда 12-асрда қурилган Torre del Gallo қасрини хатловга олди. Бу ҳақда 29 июл куни Corriere Fiorentino газетаси хабар берди. 

Бундан ташқари, яна бир қанча кўчмас мулк объектлари ва тадбиркорнинг акциялари хатловга олинган. Умуман олганда, Федоричевнинг 41 миллион евро миқдоридаги активлари мусодара қилинди, деб хабар беради Reuters. Хатловга олиш тадбиркорни коррупция, фирибгарлик ва пул ювишда гумон қилаётган Украина коррупцияга қарши прокуратураси талабига биноан амалга оширилган. 

Украинадан даромад ва Флоренцияда кўчмас мулк

Италия прокуратурасига кўра, Федоричев Украинада ноқонуний йўллар билан олинган даромадни қайта инвестиция қилган ва Флоренция трести орқали Флоренцияда йирик кўчмас мулк мажмуасига эгалик қилган. Украина Хавфсизлик хизмати Федоричевга қарши тергов ҳаракатларини 2016 йилда бошлаган. 

Федоричев логистика, юк ташиш ва товар савдоси бўйича жаҳон етакчиси - Fedcom Group раиси ва асосчиси, деб ёзади Reuters. 1994 йилдан у Монакода истиқомат қилади, 2022 йилнинг январидан эса Франциянинг «Монако» баскетбол клуби президенти. 2006 йилда Forbes журнали Федоричевни 450 миллион доллар бойлиги билан Россиянинг энг бой тадбиркорлари рўйхатига киритди.