Урганч халқаро аэропорти режадан икки кун аввал очилади

Урганч халқаро аэропорти ўз ишини 2024 йилнинг 5 август куни соат 11:00 дан қайта бошлайди. Uzbekistan Airports маълумотига кўра, қурилиш-таъмирлаш ишлари икки кун аввал якунланиши маълум бўлди. Аввал ҳаво бандаргоҳи 7 августгача ёпилиши эълон қилинган эди.

Фото: Uzbekistan Airports

Эслатиб ўтамиз, шу йилнинг 20 июлида Транспорт вазирлиги Урганч халқаро аэропортининг учиш-қўниш йўлаги капитал таъмирланиши боис вақтинчалик ўз фаолиятини тўхтатишини эълон қилган эди. Таъмирлаш ишлари олиб бориш даврида барча рейслар Нукус халқаро аэропортига йўналтирилган ва йўловчилар учун Нукус ва Урганч аэропортлари ўртасида автобус трансфери ташкиллаштирилган эди.

«Икки ҳафта ичида улкан иш ҳажми амалга оширилганини қайд этиш зарур. Хусусан, узунлиги 3000 метр, кенглиги 45 метр бўлган учиш-қўниш йўлаги қопламаси тўлиқ алмаштирилиб, мустаҳкамланди, шунингдек, иккинчи ва учинчи юриш йўлаклари капитал таъмирланди. Бу аэропортга Boeing 787 ва Airbus A330 сингари кенг фюзелажли самолётларни чекловларсиз қабул қилиш, ўз навбатида Урганч шаҳрига рейслар сони ҳамда йўловчилар оқимини ошириш имкониятини яратади», — дейилади Uzbekistan Airports хабарида.

Сўнгги марта Урганч аэропортининг учиш-қўниш йўлаги 1997 йилда капитал таъмирни бошдан кечирган, шикастланган участкаларнинг қисман таъмири эса 2018 йилда амалга оширилган эди.

#Урганч халқаро аэропорти